Aktivistë të “Lëvizjes BASHKË”, një formacion i ri politik, protestuan të enjten para Gjykatës së Tiranës pasi pretendojnë se duke vonuar regjistrimin e tyre si parti politike dhe në shkelje të afateve ligjore, gjykata po u mohon të drejtën për të marrë pjesë në zgjedhje.
Lëvizja ka kërkuar regjistrimin si parti politike në datën 9 janar. Ligji “Për partitë politike” i jep kohë gjykatës 30 ditë të shprehet me vendim, por kjo nuk ka ndodhur ende dhe themeluesit e partisë thonë se kjo është e qëllimtë.
“Gjykata e Tiranës qëllimisht po pengon regjistrimin e Lëvizjes BASHKË si parti politike. Më konkretisht, gjykatësi Agron Zhukri është duke thyer çdo afat ligjor të njohjes së një partie”, thuhet në një reagim të tyrin shpërndarë për mediat.
Gjykata e Tiranës nuk iu përgjigj një kërkese për koment të BIRN deri në publikimin e këtij shkrimi.
Sipas komunikatës së shpërndarë, gjyqtari Zhukri ka vendosur si datë për të dhënë vendimin mbi regjistrimin apo jo të forcës politike 7 marsin, një ditë pas përfundimit të afatit të vendosur nga Komisioni Qendror i Zgjedhjeve për regjistrimin e partive politike për zgjedhjet lokale të 14 majit.
Arlind Qori, kryetari i “Lëvizjes BASHKË” i tha BIRN në një bisedë telefonike se ata po shqyrtonin mundësitë juridike për të mos mbetur jashtë zgjedhjeve lokale të pranverës, por shtoi se situata nuk ishe e qartë, pasi ky ishte një rast veçantë. “Nuk ka ndodhur më parë që një parti politike të mos regjistrohet dhe kjo të pengojë pjesëmarrjen në zgjedhje”, tha Qori.
Në reagim, lëvizja e quan shtyrjen e vendimmarrjes nga Zhukri si të paligjshme dhe të pandershme.
“Kjo është e paligjshme. Kjo është e pandershme. Kjo është e pacipë. Dhe mbi të gjitha është skandaloze. Në 32 vjet pluralizëm në Shqipëri asnjë partie, asnjëherë, nuk i është ndaluar regjistrimi në zgjedhje dhe pjesëmarrja”, thuhet në reagim.
Lëvizja ngre akuza se pengimi i tyre është ndikuar nga partitë e tjera, që sipas saj “kanë frikë nga një alternativë e re”.
