Gjykata e Elbasanit pranoi të premten kërkesën e prokurorit Kreshnik Ajazi për të shtyrë me tre muaj të tjerë afatet e paraburgimit ndaj 3 blogerëve, dy rusë dhe një ukrainas, që mbahen në qeli me akuza të spiunazhit.
BIRN mësoi se Ajazi pretendoi para gjykatës se hetimet mbi akuzat e ngritura ndaj Svetlana Timofeeva, Mikahil Zorin dhe ukrainasin Fedir Alpatov, kërkonin më shumë kohë, pasi duhet të verifikoheshin materialet e gjetura në paisjet e tyre elektronike.
Por para se gjykata të shprehej për këtë kërkesë avokatët, kërkuan që gjykata të vendoste shuarjen e afateve të paraburgimit.
Isuf Shehu, që përfaqësor rusin Mikhail Zorin i tha BIRN se afatat e paraburgimit për të tre të ndaluarit kishin përfunduar në datën 21 shkurt në orën 17.15. Shehu tha se kërkesa për shtyrje nuk mund të pranohej sa kohë afatet kishin përfunduar. Avokatët kërkuan që koha e paraburgimit të llogaritej nga dita e njoftimit të arrestit nga prokuroria, më 21 gusht 2022.
Por gjyqtarja e çështjes Matilda Fetau, njëkohësisht kryetare e gjykatës, e rrëzoi këtë kërkesë duke pranuar pretendimin e prokurorit se afatet e paraburgimin fillonin me datë 24 gusht kur edhe ishte caktuar masa e sigurisë në gjykatë për të ndaluarit.
Avokati Saimir Visha, që përfaqëson ukrainasin Alpatov paraqiti kërkesë për përjashtim të trupit gjykues. Kërkesa u rrëzua po brenda ditës nga një gjykatës i Apelit Durrës. “Kërkuam përjashtim të gjyqtarit dhe shprehjen e gjykatës së Apelit përderisa gjyqtar çështje ishte kryetarja e gjykatës. E megjithatë as kjo nuk u mor parasysh. Është e papranueshme”, tha Vishaj për gazetarët.
Pasi rrëzimit të kërkesës për përjashtim gjyqtarja Fetau pranoi kërkesën e prokuroit për shtyrje të afateve të paraburgimit me tre muaj të tjerë.
Avokati Saimir Vishaj, tha se vendimi ishte i padrejtë. “Është tërësisht në shkelje të ligjit. Tre shtetas të huaj po mbahen në qeli përtej afateve”, tha ai.
Avokatët thonë se vendimi është absurd, dhe se do të apelonin atë. “Nisur nga sa tha prokurori në gjykatë, mbi verifikimin që kërkonte të bënte ka dyshime që nuk ekziston fakti penal”, tha avokati Isuf Shehu.
Shehu tha se po priste që gjykata t'i njihte mbrojtësit me aktet e vëna në dispozicion nga prokuroria. Aktet e dosjes janë konsideruar deri sëfundmi sekret nga prokurori i çështjes dhe mbrojtësit nuk janë në dijeni të tyre.
Svetlana Timofeeva 33 vjeç u arrestua më 20 gusht së bashku me Mikahil Zorin, 23 vjeç dhe ukrainasin Fedir Alpatov, 24 vjeç, pas një incidenti të ndodhur brenda rrethimit të ish-uzinës së armëve në Gramsh.
Zorin kundërshtoi dy ushtarakët që tentuan ta ndalonin dhe përdori spray me piper kundër tyre.
Tre të arrestuarit njihen si blogerë dhe janë pjesë e një subkulture të quajtur “Urban Explorer” apo “Urbex”; të apasionuar për të vizituar dhe fotografuar godina të braktisura, përfshi objekte ushtarake të “Luftës së Ftohtë”.
Megjithatë, prokuroria shqiptare i akuzon ata për spiunazh dhe pretendon se treshja kishte ardhur në Shqipëri për të mbledhur informata ushtarake dhe strategjike të sigurisë kombëtare – dyshime të pranuara deri më tani nga gjykatat.