Për të parandaluar përdorimin e administratës dhe burimeve publike në fushatë elektorale, Kodi Zgjedhor detyron të gjitha institucionet qendrore dhe vendore, që 4 muaj para zgjedhjeve të raportojnë çdo aktivitet me karakter publik pranë Komisionit Qendror të Zgjedhjeve, si dhe u ndalohet të bëjnë fushatë politike gjatë këtyre aktiviteteve.
Pasi shqyrtoi kërkesat e Komisionerit Shtetëror të Zgjedhjeve, Ilirian Celibashi, për vendosje sanksionesh ndaj 4 bashkive, KAS pranoi kërkesën për gjobë në masën 20 mijë lekë për bashkinë Berat, gjobë prej 10 mijë lekësh për bashkinë Durrës dhe Fier dhe 5 mijë lekë për bashkinë Roskovec.
Penalitetet administrative u vendosën për sekretarët e përgjithshëm të këtyre bashkive ose personit përgjegjës për raportimet në rastin e bashkisë Durrës.
KAS rrëzoi një prej kërkesave të Celibashit për sanksione ndaj bashkisë Durrës për aktivitete që kishin të bënin me mbjellje pemësh dhe vendosje ndriçimi në rrugë.
Bashkia Durrës kundërshtoi penalitetet, duke i cilësuar aktivitetet në fjalë të karakterit jopublik.
Përfaqësuesi i kësaj bashkie, Vangjel Manushi pretendoi se zyrtarët e bashkisë kanë ushtruar detyrën e tyre dhe nuk kanë pasur pasqyrim në media apo rrjetet sociale për këto aktivitete.
Por kjo bashki u penalizua për raportim të vonuar për aktivitete të tjera që ishin të hapura për publikun.
Nga data 13 janar, kur ka nisur afati i ndalimeve, KQZ nuk ka marrë vendim për të ndaluar asnjë aktivitet të institucioneve, por u ka tërhequr vëmendjen ose ka vendosur penalitete vetëm për respektimin e afateve ligjore të raportimit.
Në listën e veprimtarive të ndaluara konsiderohen veprimtari politike zgjedhore; “promovimi i investimeve me pjesëmarrjen e elektoratit e përfaqësuesve të partisë politike; pjesëmarrja e punonjësve të administratës brenda orarit zyrtar të punës në këtë lloj veprimtarie; promovimi i projekteve të ndryshme në investime, shërbime, për të cilat fondet janë planifikuar pas datës 13 Janar dhe jashtë programit vjetor buxhetor të miratuar në fillim të vitit…”.
Mes veprimtarive që ndalohen janë gjithashtu edhe shpërndarja publike e lejeve të legalizimit dhe/ose çdo titulli pronësie në periudhën e përcaktuar në këtë kujtesë; zhvillimi i veprimtarive me karakter politik/zgjedhor në selitë dhe oborret e shkollave, në spitale e të tilla të ngjashme.
