Këshilli i Lartë i Prokurorisë, KLP njoftoi të mërkurën më 15 mars se në mbledhjen plenare të datës 6 mars ka vendosur unanimisht të japë opinion pozitiv për transferimin e përkohshëm të prokurorit Olsi Dado, pranë Prokurorisë së Posaçme Kundër Korrupsionit dhe Krimit të Organizuar, SPAK, pas adresimit të kërkesës nga kjo strukturë.
Po ashtu, në njoftim sqarohet se po në të njëjtën seancë, përpara se të vendosej transferimi në SPAK i Dados, bazuar në kërkesën e këtij të fundit është ndërprerë komandimi i tij në Prokurorinë e Përgjithshme dhe kthimi në detyrën e prokurorit në Prokurorinë e Tiranës.
Olsi Dado ka punuar në sektorin privat dhe si noter, përpara se të emërohej prokuror në Prokurorinë e Pogradecit në vitin 2008. Në vitin 2010 ai u transferua në Prokurorinë e Rrethit Gjyqësor Tiranë, ndërsa prej vitit 2020 u komandua në Prokurorinë e Përgjithshme si ndihmës magjistrat, transferim që u ndërpre më 6 mars, për të filluar një komandim të ri në SPAK.
KLP thotë në njoftim se kërkesat u miratuan bazuar në legjislacionin në fuqi.
Nenit 46 i ligjit “Për statusin e gjyqtarëve dhe prokurorëve në Republikën e Shqipërisë”, i jep të drejtë drejtuesit të SPAK të mund t’i kërkojë drejtuesit të prokurorisë së shkallës së parë të japë pëlqimin për transferimin e prokurorëve me kualifikim të veçantë në zyrën e strukturës së posaçme, për të punuar me çështje të veçanta, për një periudhë të caktuar.
Përpara se të merret vendimi për transferim, drejtuesi i SPAK kërkon mendimin e KLP-së. Në ligj përcaktohet se prokurori që kërkohet të transferohet duhet të ketë jo më pak se pesë vite përvojë si prokuror, të japë pëlqimin për transferimin dhe respektimin e kushteve të sigurisë për besimin dhe konfidencialitetin në Prokurorinë e Posaçme. Transferimi nuk mund të zgjasë më shumë se një vit.
Më 26 dhjetor 2019, me kërkesë të ish-drejtuesit të SPAK, Arben Kraja, KLP dha pëlqimin për transferimin e përkohshëm të dy prokurorëve Dritan Prençi dhe Vladimir Mara. Në vijim, gjatë procedurave për plotësimit të vakancave në SPAK, Prençi dhe Mara u zgjodhën si fitues nga KLP dhe u emëruan në strukturën e posaçme.
Në mars 2021, KLP dha opinion pozitiv edhe për transferimin në SPAK të prokurores së Pogradecit, Dorina Bejko. Aktualisht në SPAK ushtrojnë funksionin 17 prokurorë të emëruar nga 20 prokurorë që duhet të ketë trupa e plotë e strukturës së posaçme, e miratuar.
