Gjykata e Durrësit zbuti të mërkurën (15 mars) masat e sigurisë ndaj kapitenit dhe tre marinarëve të anijes “Queen Majeda”, të arrestuar në shtator të vitit që shkoi pasi transportonin naftë të dyshuar si kontrabandë.
Katër të arrestuarit nga Libia dhe Siria akuzohen për transport të mallrave kontrabandë, por 6 muaj pas bllokimit të anijes me rreth 2.2 milion dollarë naftë në cisterna prokuroria nuk ka mundur të përfundojë hetimet dhe dërgojë çështjen në gjyq.
Pas kërkesës së prokurorisë, Gjykata e Shkallës së Parë në Durrës vlerësoi se afatet e paraburgimit për veprën penale ishin ezauruar dhe caktoi që të arrestuarit të qëndronin në anijen që ndodhet e sekuestruar në portin e Durrësit.
Prokurori i çështjes Edmond Kaloshi i tha BIRN në një bisedë telefonike se çështja mbetej pezull në pritje të një letër porosie nga Libia. Kaloshi tha se ishin autoritetet libiane që duhej të konfirmonin nëse nafta kishte autorizim prej tyre apo ishte ngarkuar kontrabandë. “Ata pretendojnë që kanë autorizimin nga autoritete libiane, por dyshohet që nuk e kanë”, tha Kaloshi. Ai tha se situata në Libi e vështirësonte komunikimin dhe se hetimet për rastin vijonin.
Edhe avokati i të ndaluarve Artjon Beqiraj konfirmoi lirimin, ndërsa tha se të mbrojturit prej tij do të qëndronin në anijen që ndodhet në radën e portit të Durrësit.
E ndërtuar në vitin 1994, anija cisternë “Queen Majeda” që lundron me flamur të Kamerunit u bllokua më 12 shtator të vitit të kaluar në Durrës. Anija u bllokua nga Roja Bregdetare Shqiptare dhe disa agjenci të tjera ligj zbatuese, që e shoqëruan anijen në Terminalin Perëndimor të Portit. Policia e Durrësit njoftoi se në anijen cisternë sekuestroi 2275 ton naftë kontrabandë.
Rastet e kontrabandës së naftës u përsëritën disa herë vitin që shkoi kur për shkak të luftës në Ukrainë çmimet u rritën ndjeshëm. Në shkurt të këtij viti një anije me flamur të Liberisë u bllokua në Durrës me 22 mijë e 500 tonë naftë, që dyshohet me origjinë nga Rusia.
