Policia njoftoi të mërkurën se kishte zbuluar 27 sera me mbi 8 mijë fidanë kanabisi, vetëm pak metra nga rruga nacionale Shkodër-Koplik në një kantier të braktisur inertesh në fshatin Bajzë. Policia e Malësisë së Madhe njoftoi se kishte arrestuar edhe 52-vjeçarin Nesti Delaj alias Ernest Veshtaj, i cili sipas saj dyshohet se kishte organizuar ngritjen e serave. Delajt iu kapën 3 arëm gjahu pa leje dhe municion.
Serat ishin “fshehur” në kraterin e krijuar nga gërryerja për të nxjerrë gurë dhe ndodheshin në thellësi të gropës prej 20 metrash. Fidanët ishin në kubikë dhe ishin gati për t’u shpërndarë, me qëllim kultivimin e tyre në tokë.
“Si rezultat i këtij megaoperacioni, 20 metra në thellësi të këtij krateri, janë evidentuar 27 sera, brenda të cilave janë gjetur të kultivuar në kubikë, rreth 8 000 fidanë të dyshuar narkotikë cannabis sativa, në proces për t’u kultivuar në tokë”, njoftoi policia.
Ndërkohë për rastin po ndiqen penalisht, për shpërdorim detyre, Gjovalin Gj, 61 vjeç, me detyrë Drejtor i Shërbimit Pyjor në bashkinë Malësi e Madhe; Roland Gj, 41 vjeç, me detyrë specialist i Ujësjellësit në bashkinë Malësi e Madhe, i cili mbulon zonën ku janë gjetur fidanët narkotikë dhe Arben H, 36 vjeç, me detyrë hidraulik i Ujësjellësit në bashkinë Malësi e Madhe i cili mbulon zonën ku janë gjetur fidanët narkotikë.
Policia tha se ishte e qartë se 52 vjeçari nuk ka punuar i vetëm për të ngritur serat dhe kultivuar narkotikët, dhe po heton për të zbuluar personat e tjerë të përfshirë.
Vendndodhja e 27 serave është sipas policisë në vendin e quajtur “Badra e Mehajve”, në Koplik, qendër, shumë pranë Përroit të Thatë dhe pak metra larg një venddepozitimit ilegal të mbetjeve urbane.
Kultivimi i kanabisit dhe tregtimi i tij janë kthyer në një problem masiv për policinë e Shkodrës. Më 9 mars gjatë një takimi në prefekturë për një taks-forcë kundër kultivimit të narkotikut, Drejtori i Policisë së Shkodrës Ervin Hodaj vuri alarmin se në qytet adoleshentët po përdoreshin për të shpërndarë drogën. “Një nga shqetësimet është edhe prania dhe përdorimi i lëndëve narkotike, kryesisht kanabis, në mjedise, rrugë dhe ambiente publike. 30 shpërndarës në afërsi të shkollave, mosha mesatare 22 vjeç dhe më i vogli 15 vjeç”, tha ai, ndërsa shtoi se duhej punuar për të thyer ciklin dhe ndaluar kultivimin.
