Një lidhje e paligjshme elektrike çoi policinë në një “shtëpi bari” në fshatin Qerekë të Krujës, e cila kishte dy mjedise të përgatitura për rritje të kanabisit.
Sipas policisë në shtëpi u gjetën 268 bimë të dyshuara narkotike kanabisi, 51 llamba, 1 aspirator, 2 ventilatorë dhe 51 rritës të energjisë elektrike.
Po ashtu policia tha se arrestoi vëllezërit Sh. H., 39 vjeç (pronari i banesës) dhe F. H., 32 vjeç, të dy banues në Qerekë, Krujë. Policia tha se F. H. ka kryer lidhjen e paligjshme të energjisë elektrike që shërbente për kultivimin e bimëve narkotike.
“Si rezultat i këtij operacioni, në fshatin Qerekë, Krujë, në banesën e shtetasit Sh. H., u zbuluan 2 ambiente që furnizoheshin me lidhje të paligjshme të energjisë elektrike dhe që ishin përshtatur me llamba dhe pajisje të tjera, për kultivimin e bimëve narkotike në ambiente të mbyllura”, njoftoi policia.
Kjo është hera e dytë brenda pak javësh që policia gjen mjedise të mbyllura të pajisura për kultivim narkotikësh. Më 17 mars policia zbuloi një tunel të ushtrisë që përdorej si serë për kultivimin e narkotikut.