Gjykata e Elbasanit vendosi të premten të rrëzonte kërkesën e autoriteteve ruse për ekstradimin e blogeres Svetlana Timofeeva. Vendimi për rrëzimin ishte i pritshëm pasi në seancën e dhënies së konkluzioneve prokuroria u tërhoq nga kërkesa për ekstradimin.
Vetë Timofeeva dhe avokatët e saj këmbëngulën kundër ekstradimit. Blogerja, e cila është larguar nga Rusia pas fillimit të luftës dhe që mban qëndrime kundër regjimit të Putin atje, i tha BIRN në një intervistë nga burgu se ekstradimi i rrezikonte jetën.
Svetlana Timofeeva 34 vjeç u arrestua më 20 gusht së bashku me Mikahil Zorin, 23 vjeç dhe ukrainasin Fedir Alpatov, 24 vjeç, pas një incidenti të ndodhur brenda rrethimit të ish-uzinës së armëve në Gramsh.
Zorin kundërshtoi dy ushtarakët që tentuan ta ndalonin dhe përdori spray me piper kundër tyre.
Tre të arrestuarit njihen si blogerë dhe janë pjesë e një subkulture të quajtur “Urban Explorer” apo “Urbex”; të apasionuar për të vizituar dhe fotografuar godina të braktisura, përfshi objekte ushtarake të “Luftës së Ftohtë”.
Megjithatë, prokuroria shqiptare i akuzon ata për spiunazh dhe pretendon se treshja kishte ardhur në Shqipëri për të mbledhur informata ushtarake dhe strategjike të sigurisë kombëtare – dyshime të pranuara deri më tani nga gjykatat që zgjatën masën e sigurimit ndaj tyre. Të tre të arrestuarit i kundërshtojnë akuzat.
