Prokuroria e Posaçme kundër Korrupsionit dhe Krimit të Organizuar, SPAK kërkoi për të dytën herë të hënën më 24 prill shtyrjen e seancës në procesin penal në ngarkim të ish-Ministrit të Mbrojtjes, Fatmir Mediu lidhur me akuzat e ngritura ndaj tij për përgjegjësinë në ngjarjen tragjike të vitit 2008 në Gërdec, ku humbën jetën 26 persona persona dhe u plagosën shumë të tjerë.
Në seancën e parë më 6 prill, pas pranimit të kërkesës së avokatëve të Mediut për gjykimin e shkurtuar, gjykata konstatoi se dosja e prokurorit kthehej në gjyqësore dhe u kërkoi palëve parashtrimin e konkluzioneve përfundimtare, por prokurorët kërkuan kohë për t'i përgatitur me shkrim. Megjithatë, edhe të hënën SPAK nuk arriti të paraqesë konkluzionet përfundimtare.
Një prej prej tre prokurorëve të çështjes, Klodian Braho i tha gjykatës se, për shkaqe objektive dhe ngarkesës së çështjeve të tjera, nuk i kishin përgatitur ende konkluzionet. Ai bëri me dije se dy kolegët e tjerë, prokurorët Altin Dumani dhe Arben Kraja janë jashtë shtetit dhe kërkoi shtyrjen e seancës me afatin maksimal 2 javor.
Nga ana tjetër, avokatët e Mediut kërkuan ndërprerjen e çështjes penale duke i qëndruar pretendimit se është parashkruar.
Lidhur me këtë kërkesë të mbrojtësve të Mediut, Gjykata e Posaçme e Shkallës së Parë u shpreh se do të disponojë në vendimin përfundimtar, duke vlerësuar të gjitha rrethanat e çështjes në tërësi. Bazuar në kërkesën e prokurorit Braho, u vendos ndërprerja e shqyrtimit gjyqësor dhe shtyrja e seancës për më datë 9 maj, në orën 14:00.
SPAK dërgoi për gjykim më 8 shkurt 2023 çështjen penale në ngarkim të Fatmir Mediut, i pandehur për veprat penale “shpërdorimi i detyrës”, kryer në bashkëpunim dhe “shpërdorim i detyrës”, në bashkëpunim me subjekt ushtarak-kuadër komandues.
Rihapja e çështjes ndaj Mediut u vu në lëvizje pas 12 vitesh me iniciativën e familjes së një prej viktimave të shpërthimit në mars 2008 në ambientet e ish “Brigadës së Tankeve”, me 26 humbje jete e qindra të plagosur. Sipas kërkuesve dhe SPAK, pas ndryshimeve ligjore të vitit 2012 dhe 2017, deputeti nuk ka më imunitet parlamentar për ndjekjen penale apo gjykimin e tij dhe për rrjedhojë nuk ekziston me asnjë pengesë për hetimin e tij.
Gjykata e Posaçme e Shkallës së Parë vendosi rrëzimin e kërkesës së SPAK për rihapjen e çështjes dhe fajësoi prokurorinë për mosushtrim të ndjekjes penale për 8 vite ndaj ish-ministrit të Mbrojtjes, duke argumentuar se vepra penale është parashkruar. Ky vendim u rrëzua si i pabazuar nga Gjykata e Posaçme e Apelit më 24 shtator 2021, që i hapi rrugë procedimit të Mediut.