Banorët e bashkisë së Librazhdit pritet të zgjedhin kryetarin e bashkisë mes kandidatit të Partisë Socialiste, Mariglen Disha, i cili ka punuar më herët si drejtor kadastre, dhe kandidatit të koalicionit Bashkë Fitojmë, Shefki Çota, një biznesmen që ka qeverisur më herët bashkinë e qytetit dhe që humbi në zgjedhje përballë socialistëve në vitin 2015.
Zgjedhjet në territorin e bashkisë aktuale Librazhd u fituan nga Partia Demokratike në opozitë në vitet 2007 e 2011, ndërsa rezultati u përmbys në zgjedhjet e vitit 2015 e në vijim. Në zgjedhjet e vitit 2021, Librazhdi i dha socialistëve një nga fitoret më të thella në vend, me mbi 61% të votave të vlefshme në favor të tyre, përkundrejt 36% të votave që morën dy partitë e koalicionit opozitar, PD dhe LSI.
Bashkia e Librazhdit përbëhet nga 7 njësi administrative, të cilat janë: Librazhd, Qendër Librazhd, Hotolisht, Lunik, Stëblevë, Polis dhe Orenjë. Ajo shtrihet në të dy anët e Lumit Shkumbin në një terren të thyer malor. Qyteti i Librazhdit është ndërtuar si qendër administrative për krahinën e Librazhdit në vitet 1930, e cila u transformua në Rreth në kohën e komunizmit, ndërsa sot është pjesë e qarkut Elbasan.
Ekonomia e zonës është përgjithësisht bujqësore e blegtorale, me ekonomi pyjore në Dardhë në njësinë Hotolisht dhe me shfrytëzim të paligjshëm të pyjeve në Parkun Kombëtar Shebenik-Jabllanicë. Në qytetin e Librazhdit ka edhe një fabrikë fason si dhe disa aktivitete tregtare të lidhura me qarkullimin rrugor në segmentin Elbasan-Qafë Thanë.
Zona është e pasur me burime ujore, gjë që e ka bërë tërheqëse për industrinë e hidrocentraleve të vegjël dhe që ka shkaktuar shqetësime dhe përplasje me banorët. Një numër i vogël shërbimesh turistike janë zhvilluar në kuadër të turizmit të natyrës.
Librazhdi është një zonë që merr pjesë në zgjedhje në shkallë më të lartë se sa pjesa tjetër e vendit. Pjesëmarrja ishte 53% më 2021, në krahasim me 46% në rang vendi.
Këshilli bashkiak i Librazhdit ka 21 anëtarë. Në garë janë gjashtëmbëdhjetë parti, të cilat kanë plotësuar listat e tyre me 332 kandidatë. Nëse pjesëmarrja do të jetë e njëjta me atë të vitit 2021, kjo do të thotë se një në çdo 50 pjesëmarrës në zgjedhje është gjithashtu kandidat.
