Zgjedhje 2023, rezultatet Bashkia Durrës dhe anëtarët e Këshillit Bashkiak (Infografik)

Kandidatja e Partisë Socialiste Emiriana Sako mori mandatin e parë të plotë në postin e kryetares së bashkisë së Durrësit ndërsa PS fitoi mandatin e shtatë radhazi në atë që është bashkia e dytë më e madhe në vend. Durrsakët, të cilët vazhdimisht nuk janë shfaqur shumë të interesuar për zgjedhje, shënuan një pjesëmarrje më të ulët se sa zakonisht. Të dielën e 14 majit, vetëm 90 mijë qytetarë, 34% e qytetarëve me të drejtë vote, u paraqitën për të votuar. Në zgjedhjet e vitit 2021, pjesëmarrja ishte 110 mijë votues. Të 20 mijë votuesit që nuk u paraqitën, i munguan më së shumti kandidatit të opozitës. Igli Cara, kandidati i Bashkë Fitojmë, mori 39 mijë vota, ndërsa Partia Demokratike dhe Lëvizja Socialiste për Integrim kishin marrë sëbashku gati 50 mijë vota në zgjedhjet parlamentare. Kandidatja e PS Emiriana Sako mori 49 mijë vota, ose gati 4 mijë më pak nga sa kishin fituar bashkë Partia Socialiste dhe Partia Socialdemokrate në zgjedhjet e vitit 2021. Rrjedhimisht, diferenca në përqindje mes palëve u rrit, nga 48% me 45% në vitin 2021, në 54% me 43% më 2023.

Në zgjedhjet për anëtarët e Këshillit Bashkiak PS fitoi 51% të votave dhe 28 mandate, pasuar nga  Bashkë Fitojmë me 25% të votave dhe 13 mandate. Partia Demokratike zyrtare mori 9.3% të votave dhe pesë mandate.

Kjo është lista e anëtarëve të rinj të këshillit bashkiak.