Presidenti turk Rexhep Tajip Erdogan shpalli të dielën fitoren në raundin e dytë të zgjedhjeve presidenciale pasi mori 52.13 për qind të votave, me 99.7 për qind të votave të numëruara. Rivali i tij i mundur, Kemal Kilicdaroglu, mori 47.87 për qind të votave.
“Falënderoj kombin tonë që na lejoi me vendimin e tyre të qeverisim vendin edhe për pesë vite të tjera. Dashtë Zoti, do ta ruajmë besimin tuaj, siç kemi bërë 21 vitet e fundit”, u tha Erdogan dhjetëra mijëra mbështetësve përpara shtëpisë së tij në Uskudar, Stamboll.
Mbështetësit e Erdoganit brohoritën: “Ky komb është me ty!”
Erdogan dha gjithashtu disa sinjale për pesë vitet e ardhshme të tij. “Ne do të bëjmë atë që i kemi premtuar kombit tonë në periudhën e ardhshme. Familja është e shenjtë për ne”, tha Erdogan dhe akuzoi partitë opozitare se janë pro-LGBT.
Kiliçdaroglu tha se lufta e opozitës do të vazhdojë.
“Marshimi ynë vazhdon, ne jemi këtu. Dëshiroj të falënderoj Aleancën Kombëtare dhe të gjithë qytetarët e mi që luftuan pa iu nënshtruar kësaj klime frike. Në këto zgjedhje, u shfaq vullneti i popullit për të ndryshuar regjimin autoritar”, tha Kilicdaroglu në një konferencë për shtyp në selinë e Partisë së tij Popullore Republikane në Ankara.
Kilicdaroglu ishte kandidati i përbashkët i bllokut të opozitës së bashkuar, duke shpresuar të rrëzonte Erdoganin, i cili e ka drejtuar vendin për 21 vjet.
Zgjedhjet e përgjithshme dhe presidenciale të vitit 2023 ishin testi më i vështirë me të cilin është përballur Erdogani gjatë gjithë karrierës së tij politike dhe u zhvilluan mes një krize ekonomike të thelluar dhe shqetësimeve për sundimin e tij autoritar.
Tërmetet e mëdha të shkurtit, me magnitudë 7.9 dhe 7.7 të shkallës Rihter, i përkeqësuan gjërat. Më shumë se 50,000 njerëz vdiqën dhe miliona mbetën pa shtëpi. Autoritetet njoftuan se tërmetet ka të ngjarë t'i kushtojnë ekonomisë 103.6 miliardë dollarë, e barabartë me një të tetën e PBB-së së vendit për vitin 2021.
Më 14 maj, Aleanca Popullore e Erdoganit siguroi një shumicë të rehatshme në parlament dhe vetë Erdogan mori 49.5 për qind të votave në garën presidenciale.
Kilicdaroglu mori 44.8 për qind të votave në raundin e parë, duke lënë të zhgënjyer mbështetësit e tij.
Erdogan mori urime nga aleatët e tij në botë.
“Urime presidentit Erdogan për fitoren e tij të padiskutueshme në zgjedhje!”, shkroi në Tëitter kryeministri hungarez. Të tjerë uruan gjithashtu Erdoganin, duke përfshirë udhëheqësit e Azerbajxhanit, Kosovës, Libisë dhe Uzbekistanit.
Në raundin e dytë të zgjedhjeve presidenciale pjesëmarrja në votime ishte 85%.
Pas zgjedhjeve, parlamenti i ri do të nisë punën dhe presidenti Erdogan do të emërojë kabinetin e tij të ri.
Erdogani e ka drejtuar vendin që nga viti 2002, fillimisht si kryeministër dhe më pas si president. Fillimisht u bënë reforma dhe ekonomia lulëzoi, por vitet e fundit situata ekonomike është bërë e rëndë dhe të drejtat dhe liritë janë sulmuar vazhdimisht.
