Policia e Kosovës tha të mërkurën se ka arrestuar një mashkull serb të Kosovës, i identifikuar vetëm me inicialet D.S., në komunën me shumicë serbe të Graçanicës, nën dyshimin se ka kryer krime lufte gjatë luftës së Kosovës në vitet 1998-1999.
Policia tha në një deklaratë se “janë siguruar provat për ekzistimin e një dyshimi të arsyeshëm” se i dyshuari, i cili ishte roje burgu, ishte përgjegjës për “torturën, dhunën fizike dhe psikologjike, keqtrajtime dhe trajtim çnjerëzor dhe kërcënim me jetë të të burgosurve shqiptarë” në burgjet në Prishtinë dhe Lipjan në bashkëpunim me roje të tjera.
Shtëpia e të dyshuarit u bastis nga oficerët e policisë të cilët thanë se sekuestruan një revole Zastava të kalibrit 9 mm, plus fishekë, një thikë ushtarake dhe një shufër metalike, si dhe dokumente dhe një telefon celular si provë.
Ndërsa policia e identifikoi të dyshuarin vetëm me inicialet e tij, zyra e qeverisë serbe për Kosovën konfirmoi identitetin e tij si Dragisa Milenkoviç.
Në një deklaratë thuhet se ai u arrestua “si pjesë e planit të hakmarrjes së kryeministrit të Kosovës, Albin Kurti, ndaj serbëve, të cilëve ai po ua mjeron jetën çdo ditë për t’i detyruar të largohen nga shtëpia e tyre shekullore”.
Pas arrestimit të Milenkoviçit, serbët lokalë në Graçanicë u mblodhën për të protestuar dhe bllokuan rrugën që lidh Prishtinën me Gjilanin.
Situata ka qenë e tensionuar në Kosovë që nga fundi i majit mes protestave të vendasve në komunat me shumicë serbe në veri të vendit, pasi bojkoti serb i zgjedhjeve lokale çoi në emërimin e kryetarëve shqiptarë etnikë në komuna.
Të hënën, qindra serbë të Kosovës në veri të Kosovës, të udhëhequr nga punonjës mjekësorë, marshuan nga Mitrovica e Veriut në Zveçan, ku iu bashkuan punëtorët nga miniera e Trepçës, duke demonstruar kundër arrestimeve të fundit të serbëve të dyshuar për sulme ndaj gazetarëve të Kosovës gjatë protestave.
Më 29 maj, protestuesit serbë u përleshën dhunshëm me ushtarët e forcës paqeruajtëse të NATO-s KFOR, dhe 30 ushtarë dhe rreth 50 protestues u plagosën.
Rreth 30 sulme ndaj gazetarëve janë regjistruar nga Asociacioni i Gazetarëve të Kosovës gjatë tensioneve të vazhdueshme, më i fundit të premten e kaluar.
