Nëpërmjet avokatit të tij, ish-anëtari i burgosur i Agimit të Artë, Ilias Kasidiaris, të enjten njoftoi kandidimin e tij në zgjedhjet për kryetarin e bashkisë së Athinës.
“Ilias Kasidiaris do të jetë kandidat për kryetar bashkie të Athinës në zgjedhjet lokale të tetorit dhe do të garojë për kryetar bashkie me aleancën Athina e Lirë. Synimi i tij është të shkojë në raundin e dytë dhe më pas të marrë administrimin e bashkisë”, tha avokati i tij, Vaso Pantazi.
Në maj, Gjykata e Lartë greke bllokoi pjesëmarrjen e Partisë Kombëtare Greke të ekstremit të djathtë në raundin e parë të zgjedhjeve parlamentare. Themeluesi i saj, Ilias Kasidiaris, i dënuar me 13 vite burg për pjesëmarrje në partinë tashmë të ndaluar Agimi i Artë, ishte megjithatë aktiv nga burgu në rrjetet sociale.
Kasidiaris tentoi sërish të merrte pjesë në raundin e dytë të zgjedhjeve të qershorit si kandidat i pavarur, por gjykata sërish e bllokoi pjesëmarrjen e tij.
Pasi kërcënoi fillimisht se do t’i drejtohej gjykatave më të larta greke dhe ndërkombëtare, duke vënë në pikëpyetje legjitimitetin e zgjedhjeve, pas bllokadës së Gjykatës së Lartë ai më pas mbështeti një parti të re të ekstremit të djathtë, Spartanët, në të cilën garonin edhe kandidatë nga partia e tij.
Me mbështetjen e Kasidiaris, Spartanët e panjohur deri tani hynë në parlament pasi fituan 4.67 për qind të votave pa zhvilluar asnjë fushatë parazgjedhore.
Media greke Kathimerini, duke cituar burime qeveritare, raportoi se po shqyrtohet një ligj i ri për të bllokuar kandidaturën e Kasidiaris në zgjedhjet lokale. Kjo do të ndalojë çdo person të dënuar për krime të rënda, edhe nëse është dënuar vetëm në shkallë të parë, të kandidojë në çdo zgjedhje për kryetar bashkie, guvernatori, komunale apo rajonale.
