Zyra e shtypit pranë Ramës shpërndau të martën vetëm foto dhe një video të shkurtër para nisjes së takimit pa specifikuar për çfarë u bisedua mes dy palëve.
Ndërsa ministria e jashtme britanike në një njoftim për shtyp bëri të ditur se takimi ishte fokusuar tek krimi i organizuar dhe emigrimi i paligjshëm, dy çështje që shqetësojnë prej kohësh marrëdhëniet mes dy vendeve.
“Diskutuan bashkëpunimin MB-Shqipëri në fusha kyçe me interes të përbashkët si Ukraina, Krimi i Rëndë dhe i Organizuar (SOC) dhe migrimi i paligjshëm në një takim gjatë Asamblesë së Përgjithshme të OKB-së në Nju Jork” – tha një zëdhënës i ministrisë së jashtme britanike, sipas njoftimit të publikuar në faqen zyrtare të qeverisë.
Sipas njoftimit, Rama dhe Cleverly “njohën forcën e partneritetit aktual dhe përparimin që kanë bërë të dy vendet në prioritetet e përbashkëta, veçanërisht në lidhje me migracionin dhe marrëveshjen e re të kthimit e të burgosurve, që nga vizita e Kryeministrit në MB në mars”.
Në prill të këtij viti Shqipëria njoftoi se do të presë 200 të burgosur nga Britania e Madhe pasi të dy vendet ishin zotuar që të luftojnë së bashku krimin e organizuar dhe emigracionin e paligjshëm.
Të dy vendet nënshkruan një marrëveshje në dhjetor 2022 për të trajtuar çështjen e migracionit të paligjshëm përmes një grupi të përbashkët pune, duke deklaruar se forcat e tyre të ligjit do të punojnë së bashku në luftën kundër krimit të organizuar dhe emigracionit të paligjshëm.
Kalimi i paligjshëm i dhjetra mijëra shqiptarëve nëpërmjet Kanalit të La Manshit, që ndan Francën nga Britania e Madhe u kthyer në një shqetësim serioz për qeverinë britanike.
