Gjykata e Posaçme për Korrupsionin dhe Krimin e Organizuar vendosi të martën më 3 tetor të pranojë kërkimin e prokurorisë respektive për thirrjen e 52 dëshmitarëve dhe 19 të pandehurve në çështjen e mëparshme për tragjedinë e Gërdecit, në funksion të procesit penal në ngarkim të ish-ministrit të Mbrojtjes, Fatmir Mediu i cili akuzohet për shpërdorim detyre lidhur me atë ngjarje. Mes dëshmitarëve që do pyeten janë edhe Shkëlzen Berisha, djali i ish-Kryeministrit Sali Berisha dhe deputeti i Partisë Demokratike, Aldo Bumçi.
Ndërkohë, gjyqtarja Irena Gjoka pranoi pjesërisht listën e dëshmitarëve të kërkuar nga mbrojtja e Mediut dhe refuzoi thirrjen e politikanëve të huaj dhe zyrtarëve ushtarakë të NATO-s. Për një pjesë të dëshmitarëve dhe provave gjykata u shpreh se rezervonte të drejtën për të vendosur. Përfaqësuesi ligjor i Fatmir Mediut, avokati Ardian Visha e cilësoi këtë qëndrim të gjykatës të pabazuar në procedurë.
“Gjykata tha ‘rezervoj të drejtën për të vendosur’. Ky është një standard i dyfishtë, miratues qorrazi për sa kërkon prokuroria dhe hezitues, në mos më keq akoma të mosaprovuari atë që kërkojmë neve. Kjo është e padrejtë”, deklaroi ndër të tjera avokati Visha për mediet, pas seancës gjyqësore.
Gjykata rrëzoi edhe kërkimin e përfaqësuesit ligjor të viktimave dhe famljarëve të tyre, Avokatit Dorian Matlija për pyetjen e 12 dëshmitarëve.
Në përfundim, gjyqtarja Irena Gjoka vendosi të shtyjë seancën për më datë 18 tetor, në orën 13:00, kur pritet të pyeten dëshmitarët e parë.
Gjatë tre seancave të mëparshme, prej momentit kur u pranua kërkesa e ish-ministrit të Mbrojtjes, Fatmir Mediu për revokimin e gjykimit të shkurtuar, palët në procesin e ngritur ndaj tij për përgjegjësinë në ngjarjen tragjike të Gërdecit kanë paraqitur kërkesat për thirrjen e qindra dëshmitarëve.
Rihapja e çështjes ndaj Mediut u vu në lëvizje pas 12 vitesh me iniciativën e familjes së një prej viktimave të shpërthimit në mars 2008 në ambientet e ish “Brigadës së Tankeve”, me 26 humbje jete e qindra të plagosur. Sipas kërkuesve dhe SPAK, pas ndryshimeve ligjore të vitit 2012 dhe 2017, deputeti nuk ka më imunitet parlamentar për ndjekjen penale apo gjykimin e tij dhe për rrjedhojë nuk ekziston me asnjë pengesë për hetimin e Mediut.
