Gjykata e shkallës së parë kishte pranuar fillimisht kërkesën për ekstradimin e Goxhajt më 19 shtator, pasi ai u arrestua në Tiranë me një urdhër-arresti të lëshuar nga Dhomat e Specializuara, ku po gjykohen ish-guerilë të UÇK-së për krime të kryera gjatë dhe menjëherë pas luftës së vitit 1998-1999.
Arsyetimi i Gjykatës së Apelit nuk është bërë ende dhe prokuroria mund ta apelojë vendimin në Gjykatën e Lartë.
Avokati i Goxhaj tha për BIRN në gusht se ish-luftëtari ishte akuzuar për një artikull që ai shkroi për një media ku ekspozonte emrat e disa prej dëshmitarëve të mbrojtur të mundshëm në një gjyqin për krime lufte të një tjetër ish-luftëtari të UÇK-së në Hagë.
Megjithatë, apeli i Goxhajt pretendoi se prokurori dhe gjyqtari i shkallës së parë kishin shpërfillur ligjin shqiptar.
Ai gjithashtu tha se Goxhaj po mbahej në paraburgim për shprehjen e “fjalës së lirë” dhe se ai kishte përcjellë vetëm opinionet e tij për Dhomat e Specializuara të Kosovës në media.
Më tej ai pretendoi se veprat për të cilat akuzohet Goxhaj janë “politike”.
Apeli e cilësoi kërkesën për ekstradim si “një absurditet ligjor” pasi Dhomat e Specializuara janë në Hagë dhe Shqipëria nuk ka një marrëveshje ekstradimi me Holandën.
Megjithatë, sipas ligjit të Kosovës, Dhomat e Specializuara janë pjesë e sistemit të drejtësisë së Kosovës edhe pse ato janë të vendosura jashtë vendit.
Goxhaj është rasti i parë në Dhomat e Specializuara të Kosovës ku një shqiptar nga Shqipëria arrestohet.
Mbrojtja e dëshmitarëve ka qenë një shqetësim kyç për Dhomat e Specializuara të Kosovës që nga fillimi dhe ishte një nga arsyet kryesore pse gjykata për krimet e luftës u themelua jashtë Kosovës dhe me personel ndërkombëtar, megjithëse është pjesë e sistemit të drejtësisë së Kosovës.
Gjyqet e mëparshme të ish-luftëtarëve të UÇK-së si brenda Kosovës ashtu edhe në Gjykatën Penale Ndërkombëtare të OKB-së për ish-Jugosllavinë janë shoqëruar me kanosje të dëshmitarëve. Në disa raste, edhe pasi ishin zhvendosur, atyre u afroheshin të afërm ose të tjerë duke u përpjekur t’i bindnin të tërhiqnin dëshmitë e tyre fillestare.
Ish-kryetari dhe nënkryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati dhe Nasim Haradinaj, tashmë janë dënuar për pengim të drejtësisë dhe kanosje të dëshmitarëve nga Dhomat e Specializuara.
Ata u ndoqën penalisht pasi morën një sërë dokumentesh ligjore të rrjedhura nga Dhomat e Specializuara, të cilat përmbanin informacione konfidenciale për dëshmitarët e mbrojtur, duke përfshirë emrat dhe informacione personale, më pas mbajtën konferenca për shtyp për të nxitur mediat të publikonin ekstrakte nga dosjet e zbuluara.
Dhomat e Specializuara të Kosovës po gjykojnë ish-luftëtarët e UÇK-së për krime duke përfshirë vrasje, torturë dhe ndalime të paligjshme.
Në mesin e atyre që tashmë janë në gjyq janë ish-presidenti i Kosovës, Hashim Thaçi dhe ish-kryetari i parlamentit Kadri Veseli, të cilët ishin figura të larta të UÇK-së gjatë kohës së luftës. Të dy janë vetëdeklaruar të pafajshëm për krime lufte dhe krime kundër njerëzimit.
