Prokuroria e Posaçme njoftoi të mërkurën se gjykata kishte miratuar në 1 dhjetor një kërkesë të saj për pezullimin nga detyrat publik të Granit Gjanës, ish-zëvendëskryetar i Bashkisë së Kukësit dhe sëfundmi prefekt i këtij qarku.
Sipas njoftimit të SPAK, Gjana që mori detyrat e kryetarit pas dorëheqjes së Safet Gjicit, dyshohet se ka shkelur barazinë në tendera. Prokuroria thotë se ka dyshim të arsyeshëm se Gjana duke mos kryer detyrat funksionale ka cënuar një kompani që kërkonte të ishte pjesëmarrëse në ankandet për blerje karburanti.
“Ky shtetas me mosveprimet e tij, e konkretisht mospaisjen në kohën e duhur me Autorizimin për tregtimin e lëndëve djegëse, edhe pse subjekti “U. C” shpk, i kishte kryer pagesat e nevojshme dhe dorëzuar dokumentacionin pranë organit shtetëror sipas ligjit, e ka penguar OE-në të kualifikohet në dy procedurat e tenderi”, thuhet në njoftimin e shpërndarë nga SPAK.
Sipas prokurorisë Gjana ka dëmtuar interesat e ligjshëm të personit juridik “U. C.” Shpk, “duke e penguar këtë subjekt për t'u kualifikuar në procedurën e prokurimit të mësipërm”.