Ish-senatori zviceran Dick Marty, i cili u bë i njohur në ish-Jugosllavi për raportin e tij në Këshillin e Evropës mbi krimet e supozuara të luftës, përfshirë trafikimin e organeve të kryera nga luftëtarët e Ushtrisë Çlirimtare të Kosovës, UÇK, ndërroi jetë të enjten në Zvicër, konfirmoi Partia Demokracia e Lirë.
Marty, i cili ishte një politikan i Partisë Demokracia e Lirë, autor i disa raporteve të rëndësishme ndërkombëtare për të drejtat e njeriut dhe anëtar i Asamblesë Parlamentare të Këshillit të Evropës, ishte 78 vjeç.
“Me pikëllim të madh mësuam për vdekjen e ish-këshilltarit të shteteve (anëtar i dhomës së sipërme të asamblesë federale zvicerane) Dick Marty… FDP shpreh ngushëllimet më të thella për të afërmit e tij”, tha FDP në X (ish-Tëitter). .
“E pikëlluar për vdekjen e Dik Martit, ish-anëtar i Asamblesë Parlamentare të Këshillit të Evropës dhe i vlerësuar shumë”, shkroi Marija Pejcinoviç Buriç, sekretare e përgjithshme e Këshillit të Evropës, në X.
Në dhjetor 2010, Këshilli i Evropës publikoi një raport të autorizuar nga Marty, i cili kërkonte hetime penale për pretendimet se një rrjet kriminal i lidhur me ish-zyrtarin e UÇK-së, i kthyer në lider politik, Hashim Thaçi, ishte përgjegjës për vrasjen, torturimin dhe marrjen e organeve të serbëve dhe shqiptarëve etnikë në vitin 1999.
“Tani i takon autoriteteve ta kërkojnë të vërtetën”, u tha Marty gazetarëve në atë kohë.
Qeveria e Kosovës i mohoi akuzat, duke i denoncuar ato si një fushatë shpifëse kundër UÇK-së dhe shtetit të Kosovës.
Raporti çoi në krijimin e një Task Force Speciale Hetimore të Bashkimit Evropian për të hetuar krimet e supozuara.
Task Forca e BE-së zbuloi ato që tha se ishin prova të mjaftueshme për padi, gjë që bëri që BE-ja dhe SHBA-ja t’i bënin presion Kosovës për të krijuar Dhomat e Specializuara të Kosovës për krime lufte në 2015. Megjithatë, grupi i punës nuk arriti të vërtetonte pretendimet për trafikim organesh.
Thaçi dhe ish-zyrtarë të tjerë të UÇK-së tani janë në gjyq në Dhomat e Specializuara me bazë në Hagë për krime të dyshuara lufte dhe krime kundër njerëzimit. Ata janë vetëdeklaruar të pafajshëm.
Në prill 2022, Marty i tha transmetuesit publik Radio Television Suisse se ai kishte qenë nën mbrojtjen e policisë që nga dhjetori 2020.
“Kërcënimi duket se vjen nga qarqe të caktuara të shërbimeve sekrete serbe, të cilët u kanë kërkuar personave nga bota e krimit, vrasësve profesionistë, të më eliminojnë mua thjesht për t’ua hedhur fajin kosovarëve”, tha Marty.
Në përgjigje, Agjencia e Informacionit dhe Sigurisë e Serbisë tha se i kishte dërguar një letër Shërbimit Federal të Inteligjencës Zvicerane në të cilën “dënon dhe mohon fuqishëm pretendimet dashakeqe për përfshirjen e shërbimeve serbe të sigurisë në planifikimin e vrasjes së dikujt”.
Jashtë rajonit të ish-Jugosllavisë, Marty fitoi vlerësime për raportet e tij të Këshillit të Evropës që dokumentonin ndalimin dhe abuzimin e myslimanëve nga qeveria e Shteteve të Bashkuara në burgjet sekrete të CIA-s pas sulmeve të 11 shtatorit, dhe për dokumentimin e tij të shkeljeve të rënda të të drejtave të njeriut në Kaukazin e Veriut, rajon i Federatës Ruse.
