Aktivistë të shoqërisë civile dhe qytetarë të ndryshëm paralajmëruan se do të mbanin një protestë të shtunën në 11:30 në shenjë revolte ndaj vetëvrasjes së një 41-vjeçareje nga Durrësi, njëherazi viktimë e bullzimit në rrjetet sociale.
Protesta u paralajmërua përmes profileve të ndryshme në rrjetet sociale, me moton “Bashkë kundër bullizmit” dhe “Lufto për të drejtat e tua”.
Të premten, Policia e Durrësit njoftoi vdekjen e 41-vjeçares për shkak të konsumimit të dyshuar të lëndës helmuese.
Sipas raportimit të policisë, viktima kishte bërë kallëzim në dhjetor të vitit 2022 në lidhje me një shkelje që ishte bërë në rrjetet sociale ndaj saj, ku persona të tjerë kishin hapur një adresë false në emër të saj dhe publikonin mesazhe denigruese.
Gruaja e kishte kallëzuar ngjarjen në polici, por autorët e bullizmit nuk ishin gjetur. Policia u justifikua se çështja ishte referuar në Prokurori, ku vazhdonte ende hetimi.
“Për kallëzimin e bërë në Dhjetor 2022, Policia ka kryer të gjitha veprimet dhe i ka referuar materialet në Prokurori. Nuk ka patur asnjë kallëzim apo shqetësim nga shtetësja B.L pas këtij kallëzimi,” deklaroi Policia e Durrësit.