Konkursi i zogjve solli në Durrës afro një mijë kanarina, të cilat konkuruan sipas llojeve për ngjyrën, për këngën, qëndrimin, etj.
Por numri i vizitorëve të Festivalit ishte shumë më i vogël se sa i zogjve që u paraqiten nga Federata e Ornitologëve Shqiptarë.
“Duhet të kishim një marrëveshje me bashkinë e qytetit për publicitetin e veprimtarisë – tha për BIRN Edmond Berdaku, një durrsak i pasionuar me të gjithë “puplat”, siç i quan ai zogjtë e kafazit në përgjithësi.
Sipas Berdakut, në këtë Festival duheshin paraqitur të gjithë zogjtë, si bilbilat, gardelinat, kanarinat, edhe zogj të tjerë.
Në pallatin e sportit, ku u paraqitën zogj të shumtë, për fat të keq munguan fëmijët, të cilët bashkë me prindët e tyre mbeten vizitorët më të afërt të zogjve.
Në stendat e kafazëve afrohen ndonjëherë edhe fëmijë me probleme shëndetësore, të shoqëruar nga prindërit.
Nuk janë të pakta rastet, kur zogjtë shërbejnë si terapi për pacientët e vegjël, dhe prindët janë mjaft të interesuar.
Pepino Vitti, 83 vjeç nga Bari, tha për BIRN, se një grup të pasionuarish të rajonit të tij, kujdesen për fëmijët me probleme, dhe organizojnë në spitale shfaqje me kanarina apo gardelina.
Me anë të pet-terapisë ata kanë arritur rezultate mjaft të mira edhe me fëmijët handikap, leuçemikët, apo të moshuarit – shton Pepino, me një pasion 50-vjeçar për zogjtë.
Vitti dhe një grup miqsh italianë, kanë ardhur në Durrës si pjesë e gjyqtarisë ndërkombëtare të konkursit, ndërsa e kanë ndjekur që nga fillimi ecurinë e formimit të Federatës.
Edhe Federata shqiptare bën pjesë në Organizatën botërore të Ornitologisë, por seleksionimi sipas standarteve duhet të jetë më i plotë –nënvizon Vitti.
Gjithçka mbështetet mbi pasionin e rritësve të zogjvve, dhe shkëmbimeve me njeri tjetrin.
Eduard Cara, nën/kryetar i FOSH, thotë për BIRN se Federata ka paraqitur dëshirën dhe mundësitë e saj pranë Institucioneve shëndetsore, në mënyrë që të kontribuojë së bashku me zogjtë, veçanërisht pranë reparteve spitalore pediatrike.
“Ne kemi përvojën italiane, që na shërben si shembull për terapinë ndaj fëmijëve me probleme shëndetsore – shton Cara, i cili jeton në Bari dhe Kavajë.”
E themeluar në vitin 2016, Federata e Ornitologjisë po hedh hapat e parë për të shfrytëzuar Pet-terapinë.
Eduard Cara përfiton të dëshmojë shqetësimin e tij për zogjtë e egër dhe që më pas shiten në treg.
“Jo më larg se disa qindra metra prej këtu shiten kanarina të kapura, të cilat shiten në treg. Askush nuk e prish terezinë për këtë fenomen – shprehet nënkryetari i Federatës.
Pallati i Sportit është mbushur me cicërimat e zogjve.
Pranë kafazëve kanë nisur konkurimet, me përfaqësues nga Shqipëria, Kosova, Maqedonia e Veriut, Italia dhe Greqia.
Zogjtë kanë matrikullin përkatës dhe konkurimi është shumëplanësh, ku dallohen këngëtarët, ngjyrat, qëndrimi, etj.
Kanarinat këngëtare i nënshtrohen një konkursi të veçantë, në një sallë të mbyllur, ku ata dëgjohen njëri pas tjetrit.
Ndërkohë që gjyqtaria është angazhuar në punë, në mjediset e pallatit bie në sy Fatjoni, i cili mban në shpatull një papagall jo të vogël.
Të rinjtë kërkojnë të fotografohen me Arensin, siç e ka emrin zogu me përmasa mbi normalen.
Ed Berdaku na tregon edhe dy-tre raste të tjera të pacientëve të kuruar në Durrës me pet-terapi. Është mrekulli të shohësh një pacient që është khtyer në një kujdestar të zogjve këngëtarë – tha Ed Berdaku.
Eduard Cara tha për BIRN, se ky i Durrësit është konkursi i pestë që organizohet në shkallë vendi dhe ka 110 pjesmarrës. Tre të parët kanë patur si stacion Tiranën, ndërsa para një viti konkursi u organizua në Tiranë.
Ai shton se vitin e ardhshëm konkurimi do të zhvillohet në Kavajë.
“Kam lindur atje dhe ëndërroj që konkursi i radhës të zhvillohet atje – përfundoi Cara.