Ministrja e Arsimit Ogerta Manastiliu reagoi të enjten, më shumë se 1 muaj pas publikimit të rezultateteve të testimit PISA, që vuri në dukje një rënie drastike të nivelit të nxënësve të Shqipërisë, duke ngritur dyshime mbi gjetjet dhe këmbëngulur se kishte një plan masash që do të vihej menjëherë në zbatim.
Duke folur për rezultatet Manastirliu fillimisht tha se të dhënat ishin analizuar në detaje, por më pas aludoi se rezulatat e këqija ishin si pasojë e mungesës së angazhimit dhe nuk pasqyronin gjendjen reale të arsimit parauniversitar në vend.
“Ato aspekte ku puna duhet të përmirësohet dhe ritmi duhet të shpejtohet dhe arritjet duhet të nxiten akoma me shumë, për të mundësuar që vlerësimet edhe ato ndërkombëtare sikurse është PISA, të mundet që të tregojnë dhe të na japin një pasqyrë dhe një panoramë reale, të cilat të mos penalizohen nga mungesa e angazhimit për shembull”, tha Manastirliu.
Ajo tha se kishte një plan për të ndryshuar këtë situatë, duke përfshirë trajnim të mësuesve, teste modele të ngjashme dhe kontroll në vijim të nxënësve. “Ne kemi hartuar një plan ambicioz me synim përmirësimin e rezultateve të Shqipërisë në testim e ardhshëm”, tha Manastirliu.
Raporti i PISA për testimin e zhvilluar në vitin 2022 , u publikua në fillim të dhjetorit të vitit që shkoi, dhe vuri në dukje se rënia e rezultateve të Shqipërisë krahasimisht me rezulatet e arritura në vitin 2018 ishte “një anomalitet negativ”.
Përtej faktit që Shqipëria renditej ndër vendet e fundit mes 80 vendeve në të cilat bëhet testimi PISA, rezultatet e testimit të radhës tregojnë përkeqësim në krahasim me veten. Prej vitit 2009 deri në vitin 2018, Shqipëria njohu vetëm rritje në rezultate, pavarësisht se renditja e saj krahasimisht me vende të tjera mbeti e keqe. Por të dhënat e testimit të fundit tregojnë se shumë nga ajo që ishte fituar në testimet paraardhëse u humb.
Bazuar në grafikët e raportit, rezultatet e Shqipërisë në matematikë dhe shkencë ranë poshtë atyre të arritura në vitin 2009. Në të dyja degët nxënësit kanë shënuar pak mbi nivelin e 350 pikëve. Rënia në shkencë është edhe më e madhe, pasi këtu rezultatet në vitin 2009 kanë qenë afër 400 pikëve. Rezultatet në lexim po ashtu nuk ishin më të mira, edhe pse në këtë degë rezultate ishin ende mbi nivelin e pikëve të marra në vitin 2009.
Për ekspertë të arsimit kjo është tregues i mungesës së vëmendjes së qeverisë ndaj arsimimit dhe financimin e dobët publik për shkollim.
Testi PISA është një nismë mbarëbotërore nga Organizata për Bashkëpunim dhe Zhvillim Ekonomik, OECD, për të matur aftësinë e nxënësve 15-vjeçarë për të përdorur njohuritë e tyre në matematikë, shkencë dhe lexim.
Testet eksplorojnë se sa mirë nxënësit mund të zgjidhin probleme komplekse, të mendojnë në mënyrë kritike dhe të komunikojnë në mënyrë efektive, duke dhënë një pasqyrë se sa mirë sistemet arsimore të vendeve të tyre i përgatitin ata për sfidat e jetës reale.
