Policia e Shtetit doli të premten me një njoftim zyrtar në Facebook, lidhur me një rast përndjekje në rrjetet sociale ndaj një gruaje 32 vjeçare në Durrës.
“Specialistët për Hetimin e Krimeve Kompjuterike të Drejtorisë Vendore të Policisë Durrës, menjëherë pasi një 32-vjeçareje, e shoqëruar nga një gazetare e emisionit “Piranjat”, kallëzoi se përndiqej në rrjete sociale, kanë organizuar punën për të arrestuar autorin”, shkruhet në njoftimin zyrtar të Policisë së Durrësit.
Sipas raportimit të policisë, i riu 26 vjeçar nga fshati Radë, tashmë nën arrest, kishte rreth një muaj që abuzonte me të renë nëpërmjet një llogarie në Instagram, teksa ishte dënuar edhe më parë për të njëjtën vepër penale, specifikisht përndjekjen.
“Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprat penale ‘Përndjekja' dhe ‘Ndërhyrje të padrejta në jetën private'”, citon njoftimi i policisë.
Policia deklaroi se reagimi ndaj autorëve të këtyre veprave penale do të jetë i menjëhershëm dhe me ashpërsinë e ligjit.