Prokuroria e Posaçme kundër Korrupsionit dhe Krimit të Organizuar bëri të ditur të hënën se ka përfunduar hetimet paraprake për 17 persona të përfshirë në një skemë mashtrimi të qytetarëve italianë nga një call-center në lagjen “Don Bosko” në Tiranë.
SPAK nisi procedimin penal në vitin 2021 për veprat penale të “Mashtrimit kompjuterik”, në dëm të disa personave, në bashkëpunim në formën e grupit të strukturuar kriminal dhe për veprën penale të “Krijimit të grupit të strukturuar kriminal”, pas një hetimi kishte nisur nga drejtësia italiane.
SPAK, bën të ditur se, hetimi u u shtri në të dy shtetet pasi u krijua një ‘Skuadër e Përbashkët Hetimore' me Prokurorinë italiane të Pordenones.
Pas përfundimit të hetimeve paraprake, Prokuroria e Posaçme i është drejtuar Gjykatës së Posaçme me kërkesën për dërgimin e çështjes në gjyq në ngarkim të të pandehurve Bruno Çobo, Elisa Caci, Gilbert Pushani dhe Valbona Abedinaj, Rezarta Ibrahimi, Aldo Pasku, Bruno Gjika, Antoneta Pepkolaj; Gjin Shelnishta, Hamit Dobi, Erion Kastrati, Olta Toçi, Orland Cani, Greta Pepa, Silvana Veliu, Mojsi Zuna dhe Florjan Bregu.
Sipas hetimeve shtetasi Bruno Çobo akuzohet për “Krijim grupi të strukturuar kriminal” dhe “Mashtrim kompjuterik”, në bashkëpunimin. Ndërsa personat e tjerë akuzohen për veprat penale të “Pjesëmarrjes në grup të strukturuar kriminal” dhe “Mashtrim kompjuterik”, në bashkëpunim në dëm të disa personave, në formën e grupit të strukturuar kriminal
Në njoftimin për mbylljen e hetimeve dhe nxjerrjen para gjykatës të personave të dyshuar SPAK zbardh dhe skemën e mashtrimit të kryer nga zotëruesit dhe operatorët e call center.
“Personat kontaktoheshin nëpërmjet telefonit, u propozohej blerja on line e aksioneve “Amazon” me premtimin e pa vërtetë të fitimit të shumave të majme dhe të shpejta. Në momentin që klienti në dijeni pranonte nënshkrimin e investimeve, i dërgohej një e-mail që përmbante një link nëpërmjet të cilit lidheshin për të filluar blerjen e titujve. Në këtë kontekst, viktima shkarkonte sipas udhëzimeve te telefonuesit aplikacionin “AnyDesk”, faktikisht duke i lejuar mashtruesit që të futej si i jashtëm në kompjuterin e tij dhe të marrë kodet e sigurisë të bankës, duke e lejuar për tu futur direkt në numrat e llogarive bankare”- thuhet në njoftimin e SPAK.
Sipas hetimeve, skema parashikonte që të merrte dhe më shumë para duke i bërë viktimat të besonin se duhej të paguan një lloj komisioni bankar për të marrë në zotërim shumat që ‘fitonin' nga investimi.
Për të humbur gjurmët, sipas hetimeve, grupi e kryente lidhjen “AnyDesk” në kompjuterat personal të viktimave duke përdorur një server italian të provider-it Aruba, që, sipas SPAK, “garantonte në fakt fshehjen reale të adresës IP nga ku kishte kryer komunikimi, duke bërë serverin si nyje të vetme për të gjitha komunikimet”.
Hetimi nisi nga autoritetet italiane në shtator 2020 pas kallëzimit të një shtetasi italian, i cili kishte rënë pre e mashtrimit duke ‘investuar' në këtë skemë 700.000 euro.
Sipas SPAK hetimet paraprake kanë evidentuar ekzistencën e grupit të strukturuar kriminal ndërkombëtar me qëllim mashtrimin financiar nëpërmjet “trading on line” në dëm të personave me banim në Itali.
“Hetimet kanë bërë të mundur konstatimin dhe atribuimin grupit kriminal, të episodeve të shumta mashtrimi të kryera ndaj personave me banim në të gjithë territorin e Italisë, të cilat i kanë dhënë grupit kriminal një fitim total prej rreth 4.7 milionë euro, që dyshohet se është vetëm një pjesë e vogël e shumës së përfituar nga grupi si rezultat i kësaj veprimtarie kriminale”- njofton SPAK.