Prokuroria e Posaçme kundër Korrupsionit dhe Krimit të Organizuar, SPAK njoftoi të mërkurën më 31 janar sekuestrimin e rreth 1 milion eurove pasuri të Oltian Bistrit, ish-shefit të Drejtorisë së Forcës Operacionale, i akuzuar si pjesë e një grupi të strukturuar kriminal që dyshohet se është përfshirë në trafik, vrasje, pengamrrje e korrupsion. Bistri u arrestua në fund të muajit korrik 2023 gjatë operacionit të koduar me emrin “Metamorfoza”, të nisur falë informacioneve të sjella nga drejtësia franceze që solli edhe arrestimin e biznesmenit Pëllumb Gjoka, i shpallur nga qeveria “Rama” si investitor strategjik, të prokurorit të Kukësit Xhevahir Lita dhe punonjësit të policisë Ardit Hasanbega, si dhe të 11 personave të tjerë.
Sipas SPAK, nga verifikimet e kryera gjatë këtij hetimi është evidentuar se që nga viti 2015 e në vijim, i hetuari Oltian Bistri dhe familjarët e afërm të tij kanë kryer disa transaksione të dyshimta në lidhje me shitjen dhe blerjen e pasurive të paluajtshme në një vlerë totale rreth 1 milion euro.
Prokuroria ka vendosur të sekuestrojë tre apartamente në Tiranë, dy me sipërfaqe nga 400 m2 në Tiranë dhe me çmim nga 200 mijë euro secili dhe i treti me sipërfaqe 110.6 m2 me çmim rreth 50 mijë euro, si dhe dy dyqane po në Tiranë, një me sipërfaqe 125 me me çmim 300 mijë euro dhe tjetri me sipërfaqe 95 m2 me vlerë 230 mijë euro.
Pasuritë e Oltian Bistrit kanë qenë objekt hetimi edhe në procesin administrativ të kryer nga Agjencia e Mbikqyrjes Policore, kur i është nënshtruar rivlerësimit kalimtar në cilësinë e drejtorit të Forcës së Posaçme Operacionale. Por, pak ditë para se të arrestohej si pjesë e një organizate kriminale, Bistri u transferua me urdhër të Drejtorit të Përgjithshëm të Policisë së Shtetit, në detyrën e specialistit në sektorin për Krimet në Volum.
Më 28 korrik 2023, kur SPAK njoftoi rezultatet e operacionit ndaj organizatës kriminale ku bënte pjesë dhe Bistri, trupa e vlerësimit e Agjencisë së Mbikqyrjes Policore, e kryesuar nga Erjana Pjetri, me relatore Ersa Karaj dhe anëtar Klevis Dhigoi, vendosi të ndëpresë vetingun e Bistrit pa vendim përfundimtar, duke e shmangur dhe nga verifikimi pasuror me argumentin se pozicioni ku ai ishte transferuar para pak ditësh, ishte jashtë fushës së veprimtarisë së vlerësimit kalimtar.
