Gjykata e Posaçme e Shkallës së Parë vendosi të mërkurën, më 7 shkurt, deklarimin fajtor të ish-kryetarit të bashkisë së Kukësit, Safet Gjici për veprën penale “shpërdorimi i detyrës” lidhur me aferën seksuale në zyrën e tij dhe dënimin e tij me 3 vjet burgim, që në aplikim të gjykimit të shkurtuar u reduktua në 2 vjet heqje lirie.
Safet Gjici u arrestua më 24 qershor 2023, pas publikimit të një videoje ku ai shfaqej duke kryer marrëdhënie seksuale me një grua dhe më pas duke u kërkuar vartësve të kujdeseshin për të kaluar në këshill një projekt të kërkuar prej saj për menaxhimin e qenve të rrugës.
Prokuroria e Posaçme, SPAK e dërgoi çështjen për gjykim për korrupsion pas verifikimit të rrethanave të konstatuara në videoregjistrimin që qarkulloi në internet, ku dy të pandehurit shfaqeshin duke kryer marrëdhënie seksuale në zyrën e kryetarit të bashkisë. Sipas prokurorisë, nga provat dhe të dhënat e analizuara rezultoi se e pandehura Alma Kaçi, është personi që i ka ofruar përfitime të parregullta Gjicit, ndërkohë që ky i fundit i ka përfituar prej saj favore seksuale.
Në përfundim të gjykimit, trupi gjykues i përbërë nga gjyqtarët Atalanta Zeqiraj, Erjon Bani dhe Flojera Davidhi, vendosi se Safet Gjici ka konsumuar elementët e veprës penale “shpërdorimi i detyrës”, ndërsa Alma Kaçi atë të “prostitucionit”.
Veç dënimit përfundimtar me dy vjet heqje lirie, Gjicit i është hequr e drejta për të ushtruar funksione publike për një periudhë 5-vjeçare. Kaçi e deklaruar fajtore për “prostitucion”, u dënua me 1 vit e 6 muaj, që si pasojë e përfitimit të uljes së 1/3-ës së dënimit nga gjykimi i shkurtuar, u reduktua në një vit heqje lirie.