Deputeti i Partisë Socialiste Bujar Çela do të hetohet nga SPAK për tre vepra penale, pas aksidentit në punë në magazinën në pronësi të tij, që i mori jetën 2 punëtorëve babë e bir dhe solli plagosjen e 7 të tjerëve.
Në një njoftim për shtyp Prokuroria e Rrethit Fier bëri me dije të enjten se pas hetimeve mbi aksidentin e rëndë, emri i Çelës ishte regjistruar si person që i atribuohet vepra penale, sëbashku me 6 persona të tjerë përfshi zyrtarë lokalë. Ai akuzohet për “shkelje të rregullave të mbrojtjes në punë”, “ndërtim të paligjshëm”, dhe “shkatërrimi i pronës nga pakujdesia”.
Ndërsa çështja ndaj personave të tjerë do të vijojë të hetohet në Fier, ajo për Çelën është transferuar pranë SPAk për arsye të kompetencave. “Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, bazuar në nenet 28 pika 1, 75/a, gërma “c” e 84 të Kodit të Procedurës Penale, ka shpallur moskompetencën lëndore dhe i ka dërguar aktet e çështjes penale Prokurorisë së Posaçme Kundër Korrupsionit dhe Krimit të Organizuar, Tiranë, si prokuroria kompetente për shkak të subjektit, për të vijuar hetimet ndaj shtetasi B.Ç, deputet i Kuvendit të Shqipërisë”, thuhet në njoftim.
Ndërkohë sipërmarresi i punimeve në magazinën e shërbimeve të deputetit të Lushnjes Bujar Çela, i arrestuar më parë për të njëjtin aksident është lënë me masë sigurimi burg nga Gjykata e Fierit.
Leonard Gjini, është personi i vetëm i arrestuar, pas shpërthimit të bombulës së oksigjenit, nga shpërthimi i të cilës u vrarë babë e bir Roland dhe Elidon Hoxha dhe u plagosën 7 të tjerë. Mes të lënduarve ishte edhe vetë deputeti socialist Bujar Çela.
Në gjykatën e Fierit, në seancën e masës së sigurisë me gjyqtare Dorina Alushi, 32-vjeçari Gjini i ka mohuar akuzat e prokurorisë që përfaqësohej nga Elona Gixhari dhe Lorena Salillari.
Ai tha në gjykatë se kishte lidhur kontratë të rregullt me deputetin Çela për të ndërtuar magazinën, por kompania e tij nuk e nisi kurrë punën dhe punëtorët që ishin të pranishëm në objekt ditën e shpërthimit nuk njiheshin prej tij dhe nuk ishin të kompanisë së ndërtimit që ai ka. Megjithatë Gjykata e Fierit vendosi caktimin e tij me masë sigurimi arresti në burg.
Ndërkohë po për këtë hetim prokuroria bëri me dije se kishte marrë masa ndalimi, si pezullim nga detyra dhe ndalim largimi nga vendi për 5 persona të tjerë kryesish funksionarë të Bashkisë Lushnje. Ndër personat me masa kufizuese është R.K, me detyrën e kryeinspektorit të Inspektoratit të Mbrojtjes së Territorit, Bashkia Lushnjë, M.P, E.S., K.S, inspektorë të Inspektoratit të Mbrojtjes së Territorit po në këtë bashki dhe I.U, me detyrën e inspektorit të përgjithshëm të Njësisë Bashkiake Nr. 5, Bashkia Lushnjë.