Prokuroria e Përgjithshme njoftoi të enjten më 14 mars se 11 zyrtarë të bashkisë dhe institucioneve të tjera në Sarandë ishin nën akuzë se lejuan në kundërshtim me ligjin ndërtimin e një hoteli 7-katësh pranë vijës bregdetare, si dhe proceduan me legalizimin e tij. Në njoftim sqarohet se është bërë e mundur të arrestohen 8 nga 11 personat e proceduar për veprat penale “falsifikimi dokumenteve”, “ndërtimi i paligjshëm” dhe “shpërdorimi i detyrës”.
Prokuroria e Sarandës ka proceduar për këto rrethana dy inxhinierë dhe një specialist të Drejtorisë Vendore të Agjencicsë Shtetërore të Kadastrës Sarandë; tre isnpektorë të Inspektoriatit Vendor të Mbrojtjes së Territorit të Bashkisë Sarandë; dy isnpektorë të Drejtorisë Rajonale të Inspektoriatit Kombëtar të Mbrojtjes së Territorit, Vlorë; si dhe tre shtetas të tjerë të cilët janë në kërkim. Në njoftim thuhet se po hetohet për identifikimin e personave të tjerë të përfshirë në veprime të paligjshme dhe shkelje ligjore.
