Kolegji i Posaçëm i Apelimit, KPA njoftoi të hënën më 18 mars vendimin për lënien në fuqi të shkarkimit nga detyra të gjyqtares së Fierit, Adelina Zarka. Vendimi u mor në mënyrë unanime nga trupi gjykues i Kolegjit i kryesuar nga Sokol Çomo, me relatore Albana Shtylla dhe anëtare Ina Rama, Mimoza Tasi e Natasha Mulaj, pas shqyrtimit të ankimit të Zarkës kundër vendimarrjes së Komisionit të Pavarur të Kualifikimit, KPK, për largimin e saj nga detyra.
Komisioni vendosi më 16 shtator 2021 të shkarkojë gjyqtaren Adelina Zarka për probleme të pasurisë. Me shumicë votash, trupa e KPK vendosi të mos e hapte hetimin për dy kriteret e tjera, atë të pastërtisë së figurës dhe profesionalizmit, duke i konsideruar gjetjet për pasurinë të mjaftueshme për të dalë në konkluzionin përfundimtar.
Adelina Zarka e filloi karrierën në sistemin e drejtësisë në vitin 1998. Ajo punoi prej gati dy dekadash si gjyqtare në Gjykatën e Rrethit Gjyqësor Fier.