Prokuroria e Tiranës njoftoi të enjten më 28 mrs marrjen të pandehur të 10 personave të akuzuar se ndërtuan 7 vila me dokumente rë falsifikuara në Mullet të Tiranës. “Në zonen e Mulletit, në ekonominë pyjore 1/a dhe 2/a, janë ndërtuar 7 objekte (vila), formalisht të pajisura me leje rindërtimi, por që ka rezultuar se dokumetacioni tekniko ligjor i përdorur pasqyronte të dhëna të rreme, si dhe duke cenuar fondin pyjor, në juridiksion të Bashkisë Tiranë”, citohet në njoftim.
Në vijim sqarohet se janë proceduar dhe marrë të pandehur dy arkitektë dhe dy persona të tjerë për veprën penale “Falsifikim i dokumenteve”, një për “Ndërtim të paligjshëm” dhe “Moskallëzim krimi” dhe pesë persona janë marrë të pandehur për “Ndërtim të paligjshëm” dhe “Falsifikim i dokumenteve”.
Bazuar në kërkesën e prokurorisë, Gjykata e Shkalës së Parë e Juridiksionit të Përgjithshëm Tiranë ka vendosur sekuestro preventive mbi 7 vilat e ndërtuara në Mullet. Sipas prokurorisë, po hetohet edhe në drejtim të veprimeve dhe mosverimeve të enteve publike si dhe bashkëpunëtorëve të mundshëm për veprat penale të “Falsifikimi i dokumentave” dhe “Shpërdorimi i detyrës”.