Shtatë emigrantë të huaj ende të paidentifikuar dhe transportuesi shqiptar, i identifikuar me inicialet E. B nga Shkodra, humbën jetën në të gdhirë të së martës në një aksident rrugor në rrugën Përmet-Këlcyrë.
Incidenti me emigrantët që sipas policisë kishin hyrë ilegalisht në vendin tonë nga kufiri grek në zonën pranë pikës kufitare të “Tre urave” është më i rëndi i viteve të fundit në Shqipëri, e cila përdoret si rrugë kalimi për emigrantë nga Lindja e Mesme dhe Afrika e Veriut drejt vendeve të Perëndimit.
Sipas njoftimit të policisë makina i humbi një patrulle police që po e ndiqte rreth orës 2 të mëngjesit dhe pas dy orësh u gjet plotësisht e shkatërruar në bregun e lumit Vjosa. Kur makina u rigjet, asnjë nga personat që ndodheshin në të nuk kishte shenja jete.
Drejtori i Policisë së Gjirokastrës Ardian Çipa tha se ndjekja e makinës filloi rreth orës 2:20 të datës 2 prill në afërsi të Këlcyrës. Ai tha se patrulla e policisë që kishte hasur automjetin, i ka bërë fillimisht shenjë për ta ndaluan për shkak se makina ishte me shpejtësi tej normave të lejuara. Drejtuesi i mjetit nuk i është bindur urdhërit dhe automjeti është kthyer në drejtim të qytetit të Përmetit, në përpjekje për të shmangur policinë.
Çipa vijoi më tej se patrulla e policisë me automjetin e vet është përpjekur që të marrë në kontroll vizual automjetin deri në afërsi të vendit të ngjarjes dhe rreth orës 4 të mëngjesit duke qenë se nuk e kanë riparë mjetin në rrugë, patrulla ka lëvizur në drejtim të Përmetit dhe ka pyetur qytetarë të ndryshëm nëse e kishin parë makinën.
“Duke qenë se nuk kanë marrë informacione, ka filluar inspektimi i të gjithë zonës dhe pikërisht në vendin ku ndodhemi, policia ka parë shenja të një aksidenti rrugor dhe më pas kanë mundur të lokalizojë automjetin që ka rënë në afërsi të lumit Vjosa”, deklaroi drejtori i policsë së Gjirokastrës për gazetarët
Prokurori i çështjes Petrit Çano tha se ka të dhëna për shoferin që transportonte emigrantët, por jo për kombësinë e migrantëve.
“Vetëm drejtuesi i automjetit është nga qyteti i Shkodrës, automjeti është dhënë me qira nga pikat e dhënies me qira. Pra nuk është pronari i mjetit. Të gjithë të tjerët janë persona nga vendet e treta”, tha Çano.
Prokurori tha se asnjë nga emigrantët nuk ishte identifikyar dhe as nuk ka të dhëna se nga cili vend ata vinin. Sipas tij për këtë do të priten ekspertët e mjekësisë ligjore. “Pas identifikimit do të bashkëpunojmë me ambasadat përkatëse për të dërguar trupat e tyre “, tha prokurori Çano.
Sipas prokurorit ngjarja e rëndë nuk ishte thjesht një aksident, por ka ardhur si rrjedhojë e një ngjarje tjetër kriminale që lidhet me transportimin e emigrantëve të parregullt.
“Nuk mund të themi se është thjesht një aksident. Kjo ka ardhur rrjedhojë e një ngjarje tjetër kriminale, atë të të transportit të personave që në mënyrë të paligjshme kalojnë kufirin shtetëror për të vijuar më pas në BE. Është kombinim i këtyre 2 veprave penale të cilat do i shikojmë në thellësi për të zbardhur dhe shkakun”, tha Çano.
Zona kufitare e Tre Urave në Përmet është njohur kohët e fundit për raste e kontrabandimit të migrantëve të huaj të parregullt që hyjnë nga Greqia dhe e përdorin Shqipërinë si një pikë tranzit për të udhëtuar drejt vendeve europiane, kryesisht përmes Malit të Zi.
Pak ditë më parë policia e Gjirokastrës bllokoi në hyrje të Këlcyrës një automjet ku ndodheshin 4 migrantë që po transportoheshin nga pika e Tre urave në Përmet në drejtim të kufirt të Hanit të Hotit në Shkodër.
Shoferi i mjetit dhe një person tjetër qe kontrollonte rrugën për te sinjalizuar për praninë policore u arrestuan ne flagrance.
