Prokuroria e Shkodrës njoftoi të enjten më 18 prill sekuestrimin e pasurive të biznesmenit Ago Gjolaj, i hetuar për pastrim parash. “[…]Rezulon se shtetasi A. Gj., ka dyshime se merret me kontrabandimin dhe tregtimin e mallrave kontrabandë si dhe është evidentuar si pjesëmarrës në grup kriminal që merret me trafikimin e lëndëve narkotike”, citohet në njoftimin e prokurorisë.
Po ashtu sqarohet se biznesmeni Gjolaj së bashku me dy vëllezërit e tij janë hetuar disa herë nga autoritet shqiptare madje edhe janë dënuar për vepra penale të ndryshme, si kontrabandë, tregtim mallrash kontrabandë, etj.. Duke ju referuar të dhënave të grumbulluara nga policia gjyqësore, Prokuroria e Shkodrës shprehet se ka dyshime të arsyeshme se pasuritë e shtetasit Gjolajt dhe familjarëve të tij nuk justifikohen me të ardhura të ligjshme.
Bazuar në këto të dhëna, prokuroria ka regjistruar në vitin 2020 procedim penal për kryerjen e veprës penale “Pastrimi i produkteve të veprës penale ose veprimtarisë kriminale”, prej nga është mësuar se edhe autoritetet e Malit të Zi janë duke hetuar shtetasen S.Gj. subjekt i lidhur me Ago Gjolajn, pasi në vitin 2018 ka blerë një jaht luksoz në vlerën 300 mijë euro nga shtetasi malazes S.J., i përfshirë në veprimtari kriminale dhe pastrim parash.]
Me kërkesë të prokurorisë, Gjykata e Shkodrës ka vendosur sekuestrimin e pasurive të biznesmenit Ago Gjolaj dhe personave të lidhur me të, konkretisht të shoqërisë tregtare “B.M” SHPK, me veprimtari tregtimin e artikujve të shumëllojshëm, huadhënie etj..
Nën sekuestro janë vendosur një ‘showroom' me sipërfaqe 199 m2; dy pasuri të tjera të paluajtshme; 97 automjete; si dhe gjendjet e llogarive bankare.