Prokuroria e Tiranës njoftoi të enjten më 25 prill shpalljen në kërkim të dy personave të akuzuar për krijimin një skeme mashtrimi me TVSH, me pasojë 1 milion euro dëm shtetit. Ndërkohë, dyshohet se në këtë skemë mashtrimi janë të përfshirë subjekte dhe persona të tjerë, mes tyre zyrtarë të administratës publike, që sipas prokurorisë janë duke u hetuar.
Në njoftim thuhet se Gjykata e Tiranës ka pranuar kërkesën për caktimin e masës së sigurimit persona “arrest në burg”, ndaj L.D., administrator i një shoqërie dhe bashkëpunëtorit të tij, S.K., specialist taksash në Drejtorinë e Borxhit, në Administratën Tatimore.
“Nga analizimi dhe studimi i të dhënave të shoqërive objekt hetimi, rezulton se ato kanë funksionuar si furnizues, të cilët kanë lëshuar fatura fiktive duke mos kryer asnjë blerje dhe duke mos ushtruar në asnjë moment aktivitet ligjor. Faturat fiktive janë injektuar në mënyrë direkte në shoqëri tregtare që operojnë në fusha të ndryshme, në vlerën totale prej 320,608,000 lekë, duke i shkaktuar shtetit një dëm financiar në TVSH dhe TF (Tatim Fitimi), afërsisht 1 milion euro”, citohet në njoftim.
Sipas prokurorisë, dy të kërkuarit, në bashkëpunim me njëri-tjetrin dhe të lidhur ngushtë me subjektin fiktiv Al-Dor, akuzohen se kanë konsumuar elementë të veprës penale “Skemë Mashtrimi në lidhje me Tatimin mbi Vlerën e Shtuar” dhe “Bashkëpunimit”.
Prokuroria thotë se po hetohet dhe për persona dhe subjekte të tjera, si dhe funksionar të administratës shtetërore, që dyshohet se janë përfshirë në këtë skemë mashtrimi.