Delegacioni i Bashkimit Evropian në Shqipëri mbajti qëndrim të hënën më 29 prill lidhur me sulmin me lëndë plasëse në banesën e gjyqtarit të Shkodrës, Tonin Stërkaj, ngjarje e ndodhur në orët e para të mëngjesit të së dielës. “Ne dënojmë ashpër sulmin e fundit ndaj një gjyqtari në Shqipëri. Siguria e gjyqtarëve dhe prokurorëve nga kërcënimet është thelbësore për pavarësinë e gjyqësorit dhe në luftën kundër korrupsionit dhe krimit të organizuar”, citohet në një postim të Bashkimit Evropian në platformën X.
Po të hënën, u mblodh edhe Komisioni për mbrojtjen e magjistratëve, me përfaqësues edhe nga Këshilli i Lartë Gjyqësor. Koordinatorja për të drejtën e informimit në KLGJ, Blerta Ngucaj sqaroi për BIRN se ka një vendimarje për caktim mbrojtje për gjyqtarin Stërkaj, por nuk dha më shumë të dhëna, duke arumentuar se shkak të natyrës së këtyre çështjeve, ato zhvillohen me dyer të mbyllura.
Porta e banesës së gjyqtarit të Shkodrës, Tonin Stërkaj u shpërthye me lëndë plasëse mëngjesin e të dielës më 28 prill rreth orës 03:13, duke shkaktuar dëme materiale. Fatmirësisht nuk ka pasur të lënduar nga ky shpërthim i ndodhur në banesën e gjyqtarit Stërkaj në lagjen “Tom Kola” në Shkodër, ngjarje që po hetohet nga prokuroria si kanosje për shkak të detyrës.
Këshilli i Lartë Gjyqësor e dënoi ngjarjen përmes një deklarate për mediat të dielën, duke e konsideruar atë një cënim jo vetëm për sigurinë e gjyqtarit Stërkaj, por dhe si kërcënim për të gjithë shoqërinë shqiptare.