Prokuroria e Tiranës njoftoi të martën më 7 maj sekuestrimin e disa pronave të paluajtshme, të shtatë automjeteve dhe të llogarive bankare të një personi nën hetim për pastrim të parave të dërguara nga shtetas anglez, pa ndonjë lidhje mes tyre.
Nga hetimi ka rezultuar se në llogaritë bankare të shtetasit A.M. dhe ish-bashkëshortes së tij, A.Xh., kanë mbërritur transferta në vlera të konsiderueshme nga viti 2007 e deri në vitin 2023.
“Dërgesat janë bërë nga shteti anglez dhe dërgues kanë qenë shtetas të huaj, ku midis tyre dhe përfituesve nuk provohet asnjë lidhje. Transfertat bankare në llogaritë e tyre janë bërë pa përshkrim veprimi,” citohet në njoftimin e prokurorisë.
Lidhur me këto transferta, A.M. ka deklaruar se shumat e depozituara në llogarinë e tij kanë qenë kapar për blerjen e një pasurie të paluajtshme në Durrës, e cila do të përdorej për të ndërtuar një resort turistik, ku të dy do ta kishin në bashkëpronësi.
Prokuroria vlerëson se duhet vendosur sekuestro preventive, pasi ekzistojnë indicie dhe prova të mjaftueshme që krijojnë dyshimin e arsyeshëm se shtetasi A. M. në bashkëpunim me ish-bashkëshorten e tij kanë konsumuar veprën penale “Pastrimi i produkteve të veprës penale ose veprimtarisë kriminale”. Në këtë skemë dyshohet se është e përfshirë edhe një shtetase britanike, e cila ka kryer transferta për shtetasin nën hetim si dhe gjithashtu ka blerë pasuri në bashkëpronësi me të me vlera të konsiderueshme. Në transfertën e kryer për blerjen e një trualli, A. M. ka deklaruar se të ardhurat kanë qenë kursime familjare të përftuara si pasojë e emigrimit, ndërkohë që rezulton se ai është deportuar në vitin 2007 dhe këto para nuk i ka qarkulluar më parë në sistemin bankar, pavarësisht se ka 17 vite që është kthyer nga Anglia.
Për këto arsye, prokuroria thotë se ka kërkuar vendosjen e “Sekuestros preventive” mbi tre ngastra toke të llojit “arë” në Kamëz me sipërfaqe totale 1246 m2; dy troje me sipërfaqe totale 2000 m2; ndaj llgarive bankare të shtetasve A.M. dhe A.Xh.; si dhe ndaj shtatë automjeteve luksoze, mes tyre një Hummer H2; BMW X6 Xdrive dhe Range Rover Evoque.
