Një shtetas shqiptar i dënuar në Belgjikë pesëmbvëdhjetë vjet më parë për trafik kokaine dhe krime të tjera humbi prona të tundshme dhe të patundshme me vlerë prej minimalisht 1.2 milionë euro si pasojë e zbatimit të ligjit “Për Parandalimin dhe Goditjen e Krimit të Organizuar, Trafikimit dhe Korrupsionit nëpërmjet Masave Parandaluese kundër Pasurisë”, të njohur më së shumti si Ligji Antimafia, bëri të ditur SPAK të premten.
Shtetasi Flamur Sinanaj ishte dënuar në Antverpen të Belgjikës me tetë vjet bur për trafik kokaine, mashtrim dhe falsifikim dokumentesh. Kjo nuk e ndaloi atë të blinte në Shqipëri, vetë apo përmes personave të lidhur, prona të shumta të luajtëshme dhe të paluajtëshme, përfshirë një apartament në rrugën Muhamet Gjollesha dhe një dyqan po në të njëjtën zonë si dhe një apartament të dytë në rrugën Reshit Petrla në Tiranë. Verifikimi në sitemin bankar zbuloi gjithashtu shtatë llogari bankare në banka të ndryshme me vlerë prej mbi 660 mijë eurosh dhe tre llogari të tjera në lekë me vlerë 7.5 milionë lekë.
Sinanaj dispononte edhe një varkë Yamaha 242X Limited USA me kosto të panjohur, një Jetski si dhe automjete.
Ligji “Antimafia” u miratua në Shqipëri në vitin 2009 dhe në bazë të këtij ligji, personat e dënuar për krime janë automatikisht të detyruar të justifikojnë para autoriteteve me mjete të ligjshme pronat apo paratë që disponojnë ose përndryshe merret e mirëqenë se këto prona janë produkt i veprave penale, pavarësisht nëse ka apo jo prova që të lidhin drejtpërsëdrejti blerjen e pronës me veprën penale për të cilën janë dënuar.
Ligji, i cili është kopjuar nga Italia dhe që është përdorur si mjet efikas për të luftuar krimin e organizuar, është përdorur rrallëherë në Shqipëri që nga miratimi i tij pesëmbëdhjetë vite më parë. Ai konsiderohet si mjet efikas për të diskurajuar personat e pasuruar përmes aktiviteteve kriminale që së paku të ekspozohen publikisht përmes blerjes së pronave apo jetës së luksit.
