Dymbëdhjetë persona të hetuar për rastin e trafikimit të mallrave luksoze kontrabandë nga Franca drejt Shqipërisë ose anasjelltas, u dërguan për gjykim nga prokuroria e posaçme pas përfundimit të hetimeve, njoftoi SPAK. Hetimi i nisur në vitin 2022, u realizua nga një skuadër e përbashkët hetimore mes autoriteteve shqiptare dhe atyre franceze. Të akuzuarit vlerësohet se kanë punuar në kuadër të një grupi të strukturuar kriminal, gjë që rëndon masën e dënimit për veprat penale të kryera.
“[…]Ka rezultuar e provuar se, një strukturë kriminale ishte krijuar në rajonin e Lionit-Francë, e cila në bashkëpunim me një grup kriminal nga Shqipëria, koordinonte aktivitete të ndryshme të paligjshme, dhe fitimet e realizuara i dërgonte në Shqipëri. Veprimtaria kriminale e tyre kamuflohej pas aktivitetit të disa agjencive të udhëtimeve, me objekt veprimtarie në transportin e udhëtarëve dhe mallrave nga Shqipëria drejt vendeve të Bashkimit Evropian dhe anasjelltas”, thotë SPAK në një njoftim për shtyp.
Grupi i parë i përbërë nga të pandehurit Agustin Mesuli, Altin Doda, Florian Baku dhe nga Sokol Briant (alias Brahimi, alias Balili), Dritan Ulqinaku, këta të fundit të proceduar nga drejtësia franceze, akuzohen se relalizonin grumbullimin e sendeve të vjedhura e të shumave monetare që rridhnin nga aktivitete kriminale dhe për pas i transportonin në Shqipëri. Fillimisht paratë dhe sendet me vlerë të vjedhura grumbulloheshin në Hotel d’Alsace që administrohej nga Sokol Briant, i cili ua dorëzonte të pandehurve Agustin Mesuli, Altin Doda dhe Dritan Ulqinaku, të cilët punonin si shoferë në itinerarin Shqipëri-Francë-Shqipëri, dhe merrnin përsipër transportin e tyre në mënyrë të fshehtë, kundrejt fitimit nga 3% deri në 7%.
Grupi i dytë që përbëhet nga të pandehurit Sokol, Elda dhe Egi Idrizaj, si dhe bashkëpunëtorët e tyre të proceduar nga autoritetet franceze, akuzohen se kanë transportuar shuma monetare të padeklaruara nga Shqipëria drejt Francës dhe kanë blerë atje produkteve të luksit nga firmat më prestigjioze.
Blerjet janë realizuar me para në dorë ose nëpërmjet kartave bankare të hapura në emrin e tyre apo përmes lidhjeve të tyre shoqërore. Këto produkte janë transportuar më pas nga të pandehurat Elda Bora dhe Egi Idrizaj e i pandehuri Dejvi Skënderaj, si dhe nga kompanitë e transportit “Erdisa Tours”, “Altini Travel” dhe “Tani Tours”, duke u future kontrabandë në Shqipëri.
“Nga hetimet e kryera ka rezultuar e provuar se, të pandehurit Idrizaj, për interesa të aktivitetit të paligjshëm kriminal merrnin shuma të konsiderueshme monetare me përqindje (deri në 10% në muaj), nga persona të cilat nuk ishin të licencuar për të kryer një aktivitet të tillë, e më konkretisht nga të pandehurit Agustin Mesuli, Altin Doda, Vangjush Kashara dhe Tomorr Barruti, të cilët kanë konsumuar elementët e veprës penale ‘Ushtrimi pa licencë i veprimtarisë bankare”, citohet në njoftim.
Të pandehurit Agustin mesuli, Altin Doda dhe Dritan Ulqinaku, drejtues të kompanive të transportit “Erdisa Tours”, “Altini Travel” dhe “Tani Tours”, ka rezultuar se kanë marrë përsipër transportin e produkteve dhe dorëzimin e tyre të sigurt me garanci 100% në Shqipëri, duke pasur mbështetjen e autoriteteve policore në Pikën e Kalimit Kufitar Port Durrës. SPAK akuzon punonjësit e pikës së kalimit kufitar. Gentian Aga dhe Alid Shehi për “Shpërdorim detyre”.
Nga hetimi janë konstatuar mbi 300 vjedhje të kryera, nga sendet e vjedhura, kryesisht bizhuteri prej ari, orë dore, pajisje elektronike etj., ia kanë rishitur Sokol Briantit, në ambientet e hotelit ku punonte në Lion-Francë. Disa prej këtyre sendeve janë sekuestruar në banesat e të pandehurve.
Konkretisht, janë gjetur dhe sekuestruar rreth 59 mijë euro; 10 mijë dollarë kanadez; 57 ora dore të markave Hamilton, Omega, Rolex, Baume & 7Mercier, Cartier, Breitling, Hublot Geneve, Edifice; një aparat fotografik; 9 laptopë; 7 I-Pad; 3 tablet; 28 aparate celularë; 2 kompjutera; 33 copë bizhuteri dhe 2 monedha ari; 1 stilolaps Cartier; 2 Stilografë; sasi e konsiderueshme syze dielli të markave të ndryshme të markave DG, Louis Vuitton, Ray Ban, Giorgio Armani, Versace; sasi e konsiderueshme parfume dhe kremrash të markave Versace Dylon Blue, Dolce Gabbana, Hermes, Avon Glamour, Asabi, Channel Blue, Armani “Si”, Louis Vuitton; karta të ndryshme bankare; veshje të markave të ndryshme të markave Dior, Christian Louboutin, Christian Dior, Hermes, Moncleir, Balenciaga; si dhe çanta apo këpucë të firmave prestigjoze etj.
SPAK sqaron se janë proceduar nga autoritetet franceze të drejtësisë 13 persona, dhe gjatë kontrolleve të ushtruara prej tyre janë sekuestruar 305 mijë euro; 115 copë bizhuteri të ndryshme; 50 orë dore të markave të ndryshme luksoze, etj..
Për të identifikuar bashkëpunëtorë të tjerë të mundshëm, SPAK ka ndarë procedimin penal dhe thotë se po vijon hetimet.
