Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 18 korrrik se ka kërkuar konfiskimin e pasurive të tetë të hetuarve dhe dënuarve për trafik droge, prostitucion dhe krim të organizuar, si dhe të atyre në emër të personave të lidhur me ta. Në njoftim thuhet se në shkurt të vitit 2024, SPAK ka filluar hetimin pasuror ndaj Zamir Hoxhës, Vladimir Hoxhës, Dilaver (Oliver) Hoxhës, Mentor Hoxhës, Alfonc Hoxhës, Gabriel (Admir) Bicit, Rampo Qinamit dhe Ervin Çejkut. Perosnat që i janë nënshtruar hetimit pasuror janë të afërm me lidhje gjaku mes tyre.
Zamir Hoxha është duke u hetuar nga Prokuroria e Posaçme prej vitit 2023 për veprat penale “Trafikimi i narkotikëve”, kryer në bashkëpunim në formën e veçantë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”. Ai akuzohet si pjesëtar i një grupi të struktuar kriminal të drejtuar nga Jetmir Kastrai(Sokol Krasniqi), me veprimtari në trafikimin dhe shpërndarjen e lëndëve narkotike në Danimarkë, Belgjikë, Holandë, Suedi, Norvegji dhe Gjermani gjatë periudhës kohore të viteve 2018-2019. Shumica e anëtarëve të këtij grupi të struktuar kriminal janë deklaruar fajtorë dhe janë dënuar nga autoritetet gjyqësore në Danimarkë.
Në vijim, prokuroria sqaron se, katër vëllezërit Zamir, Vladimir, Dilaver (Oliver) dhe Mentor Hoxha, që përpara vitit 2012 kanë qenë të dyshuar, janë hetuar apo janë dënuar nga autoritetet e drejtësisë italiane, për vepra penale të rënda si “Pjesëmarrje në organizatë kriminale me qëllim shfrytëzimin dhe favorizimin e prostitucionit”, “Emigracioni klandestin” dhe “Trafikimi i lëndëve narkotike”.
Alfons Hoxha, djali i një prej vëllezërve Hoxha, rezulton se është arrestuar në Gjermani në vitin 2020, për veprën penale “Shkelje e ligjit për lëndët narkotike”. Nipi i tyre, djalli I një prej motrave, Gabriel (Admir) Bici, është arrestuar në Mbretërinë e Bashkuar, në kuadër të operacionit “Mudde” me qëllim shpërbërjen e një organizate kriminale që merrej me riciklimin dhe trafikimin e lëndëve narkotike. Në Mbretërinë e Bashkuar është arrestuar për trafik të narkotikëve dhe nipi tjetër Rampo Qinami. Një tjetër nip, djali i motrës së vëllezërve Hoxha është ndaluar në Suedi për trafik të narkotikëve.
Me kërkesë të SPAK, Gjykata e Posaçme e Shkallës së Parë ka vendosur më parë sekuestrimin e 28 pasurive të luajtshme dhe të paluajtshme, në pronësi të subjekteve të hetimit pasuror apo personave të lidhur me ta.
Prokuroria thotë se në përfundim të këtij hetimi, i kërkohet gjykatës të konfiskojë pesë llogari bankare me gjendje totale prej 94 mijë euro; pesë llogari të tjera bankare me gjendje 145 mijë lekë; truall dhe ngastër toke e llojit arë me sipërfaqe totale 600 m2 dhe banesë tre kate e ndodhur në fshatin Domje të Bashkisë Vorë; sipërfaqe e njëjtë toke me një banesë dy kate po në Domje; dy ngastra tokë arë me sipërfaqe të përgjithshme 8800 m2; tre ngastra tokë arë me sipërfaqe totale 60 mijë e 436 m2 në Fushë-Mamurras Kurbin; rreth 2000 m2 tokë arë në fshatin Lalëz në Durrës; njësi me sipërfaqe ndërtimi 325.8 m² në Mëzez, Njësia Administrative Kashar, Tiranë; apartament 1+1 në godinën e banimit 5 kate + 1 kat “Roof Garden” në Dhërmi; ambient me sipërfaqe 742.05 m2 në katin e parkimit në një pallat në Tiranë; si dhe shtatë automjete, mes tyre dhe të markave të shtrenjta si Cadillac, Mercedes Benz dhe BMW.
