Në përmbyllje të fjalimit të tij në kongresin e Partisë Socialiste, kryeministri Edi Rama njoftoi zëvendësimin e kryetares së Kuvendit, Lindita Nikolla – e dorëhequr për arsye shëndetësore, me Elisa Spiropalin.
Rama njoftoi se deputeti Blendi Çuçi do të emërohej nënkryetar i Kuvendit, ndërkohë mininistri i Mbrojtjes, Niko Peleshi do të marrë kryesimin e grupit parlamentar socialist.
Peleshi do të zëvendësohet si ministër Mbrojtje nga kreu i Autoriteti Portual Durrës, Pirro Vengu.
Ministri aktual i Brendshëm, Taulant Balla do të emërohet ministër i Shtetit për Marrëdhënie me Parlamentin dhe do të zëvendësohet nga Ervin Hoxha, i cili ka mbajtur deri tani postin e drejtorit të Inspektoriatit Kombëtar për Mbrojtjen e Territorit, IKMT.
Ndryshime do të ketë dhe në ministrinë e Financave, ku Ervin Mete do të zëvendësohet nga Petrit Malaj, drejtori aktual i Agjencisë Kombëtarë të Burimeve Natyrore (AKBN).
Ndryshimet në qeveri të propozuara nga kryeministri pritet të marrin miratimin e kreut të shtetit, Bajram Begaj.
