Prokuroria e Posaçme njoftoi të mërkurën se kishte mbyllur hetimet dhe se ka dërguar në gjyq çështjen penale ndaj 11 personave, mes të cilëve tre ish-oficerët e policisë Erzen Breçani, Dedan Gjoni dhe Jonida Babameto.
Veç tre ish-oficerëve të policisë për gjykim u dërguan çështja ndaj Ismail Zeneli, Bujar Ajeti, Adrian Cenaj (Dedja), Bajram Grabova, Albert Prenga, Artan Sulejmani, Besmir Murtati dhe Eralbi Breçani.
Breçani, ish-funksionar i lartë i Policisë së Shtetit akuzohet për pastrim parash në bashkëpunim dhe përkrahje të krimit. Ai dyshohet se ka ndihmuar të akuzuarin si vrasës me pagesë Nuredin Dumani. Ndërkohë ish-oficeri Dedan Gjoni, akuzohet si anëtar i organizatës kriminale.
Grupi u godit në nëntor të vitit që shkoi pas të dhënave të marra prej aplikacionit SKY EÇ, në të cilin sipas prokurorisë gjenden biseda komprometuese ndaj tyre. Grupi dyshohet se është përfshirë në trafik kokaine nga Amerika Latine në Europë, si dhe në ngjarje kriminale të ndodhura në Shqipëri.
“Ky grup i strukturuar kriminal karakterizohet nga një organizim i mirë koordinuar dhe një bashkëpunim i ngushtë ndërmjet anëtarëve të tij. Grupi është i përfshirë në trafikimin ndërkombëtar të narkotikëve, ku çdo anëtar ka role dhe detyra specifike, nga financimi dhe porositja, deri te transporti dhe shpërndarja e lëndëve narkotike”, thuhet në njoftimin e SPAK.
Grupit i është kapur rreth 450 kilogramë kokainë, ndërsa SPAK sekuestroi një hidrocentral në pronësi të Breçanëve, makina dhe llogari bankare.
Prokuroria thotë se hetimet zbuluan përfshirjen e policisë në këtë grup kriminal. “Përveç trafikut të narkotikëve, ky grup i strukturuar kriminal shfrytëzoi pozitat zyrtare të disa funksionarëve të agjencive ligjzbatuese shqiptare për të mbledhur dhe shpërndarë informacion të klasifikuar, të cilët i ndihmonte anëtarët e tij që t’i shmangeshin drejtësisë dhe të vijonin aktivitetin kriminal”, thuhet në njoftim.
Prokuroria thotë se për anëtarë të tjerë të grupit që nuk janë arrestuar dhe të tjerë të përfshirë në këtë organizatë hetimet janë veçuar.
