Prokurorja e Durrësit, Oltiana Gjoni Çifliku u përball të martën më 3 shtator me Komisionin e Pavarur të Kualifikimit, KPK, kur gjatë seancës dëgjimore dha shpjegime për gjetjet lidhur me pasuritë e ish-bashkëshortit, si dhe për disa denoncime nga publiku.
Procesi i vetingut për prokuroren Gjoni po kryhet nga trupa e KPK e kryesuar nga Roland Ilia, me relatore Genta Tafa Bungo dhe anëtare Suela Zhegu. Në cilësinë e vëzhgueses ndërkombëtare ishte e pranishme Marie Tuma.
Oltiana Gjoni përfundoi studimet në Shkollën e Magjistraturës në vitin 2011 dhe pas një periudhe stazhi në Prokurorinë e Tiranës, u emërua në Prokurorinë e Rrethit Gjyqësor Shkodër. Prej vitit 2015, ajo e ushtron funksionin e prokurores pranë Prokurorisë së Juridiksionit të Përgjithshëm Durrës.
Relatorja Bungo vërejti në fillim të seancës se prokurorja Gjoni ka shpjeguar se ka jetuar me të fejuarin gjatë periudhës 2011-2015, me të cilin është martuar në 2015-ën. Ndërkohë, janë ndarë faktikisht në vitin 2017 dhe me vendim gjyqësor në 2018-ën. Gjoni ka deklaruar për Komisionin, se nuk ka kërkuar asnjë pjesë nga pasuria e bashkëshortit, pasi janë krijuar para martese.
Bungo konstatoi se nuk janë gjetur probleme në blerjen e një automjeti nga subjekti në vitin 2014 për çmimin 2200 euro; në një llogari ku ish-bashkëshorti depoziton pensionin ushqimor të fëmijës; si dhe për një llogari dy emërore në emër të saj dhe të ish-bashkëshortit.
Në vijim, Bungo renditi një sërë gjetjesh për pasuritë e ish-bashkëshortit të subjektit. Sipas KPK, ish-bashkëshorti ka rezultuar në pamundësi për blerjen e një sipërfaqe toke në Shkallnur të Durrësit në vitin 2014, për vlerën 7 milionë lekë. Kjo pasuri, rezulton të jetë vendosur si barrë hipotekore. Ndërkohë, nga hetimi ka rezultuar se është blerë nga ish-vjehrri subjektit në vitin 2006. Megjithëse ka rezultuar se ish-bashkëshorti dhe babai i tij kanë pasur veprimtari dhe qarkullim financiar në vlera të konsiderueshme në aktivitetet e tyre, nuk rezulton të jetë shpërndarë dividend dhe për rrjedhojë ëhstë konstatuar pamundësi për kryerjen e lkëtij investimi.
Komisioni ka verifikuar dhe një banesë me tre kate. Pagesat për shlyerjen e çmimit të kësaj pasurie rezulton të jenë kryer para se subjekti të fillonte detyrën dhe para martese. Rezulton që prokurorja Gjoni të mos ketë pjesë takuese në këtë pasuri. Megjithatë, KPK i ka kërkuar Gjonit të shpjegojë se përse ish-bashkëshorti nuk e ka shënuar këtë pasuri në deklaratën veting.
Në vijim, Bungo konstatoi se ish-bashkëshorti ka blerë tokë në Xhafzotaj të Durrësit në vitin 2013 për shumën 2.4 milionë lekë. Komisioni konstaton se pasuria është blerë para martesës. Sipas Bungos, dhe në këtë rast, megjithëse ish-bashkëshorti dhe familjarët e tij kanë pasur qarkullime të konsiderueshme të vlerave monetare, nuk është shpërndarë dividend dhe nuk janë konsideruar në analizë, prej nga ka rezultuar pamundësi.
Në këtë tokë, është ndërtuar në vitin 2000 një magazinë, për të cilën KPK vlerëson se subjekti nuk mund të ngarkohet me përgjegjësi.
Komisioni konstaton se, ndryshe nga sa deklaruar ish-bashkëshorti i subjektit për shkëmbimin e një automjeti të llojit Reno me një Benz në vitin 2003, ka rezultuar se për këto mjete ka kontrata shitblerje. Për rrjedhojë, nga analiza financiare për Benz-in, ka rezultuar pamundësi financiare në shumën 500 mijë lekë. Edhe për blerjen e automjetit të llojit Reno në 2011-ën, është konstatuar bilanc negativ në shumën 873 mijë lekë.
Ish-bashkëshorti subjektit ka deklaruar aksionet e tij në disa shoqëri. Sipas KPK, duket se ai nuk ka pasur të ardhura të mjaftueshme për investimet e kryera. Nga analiza financiare paraprake e përgjithshme, ka rezultuar pamundësi në vlerën 8.8 milionë lekë.
Prokurorja Gjoni falënderoi Komisionin për objektivitetin në hetimin administrativ të kryer ndaj saj. Ajo theksoi se martesa e saj faktike ka qenë vetëm dy vjet e gjysëm, ndërkohë që të gjitha barrat e provës kanë të bëjnë me pasuritë e ish-bashkëshortit. Subjekti këmbënguli se vërtetohej me prova se ato pasuri ishin të ish-bashkëshortit dhe familjarëve të tij.
Për pamundësinë në blerjen e tokës bujqësore, Gjoni tha se pagesa ishte kryer prej ish-vjehrrit në vitet 1996-1997, para fillimit të detyrës dhe para martesës. Sipas saj, edhe ish-bashkëshorti në atë kohë ka qenë 11 vjeç.
Lidhur me nënshkrimin e kredisë në vitin 2016, ajo shpjegoi se ishte ristrukturuar kredia dhe kishte firmosur në cilësinë e bashkëshortes. Ajo kërkoi që vlera e kësaj pasurie dhe shpenzimet e kryera të mos përfshihen në analizën financiare.
Lidhur me automjetet, subjekti shpjegoi se ish-bashkëshorti kishte bërë aksident me makinën e llojit Reno dhe për arsye besëtytnie kishte vendosur të mos e përdorte më. E kishte shkëmbyer me Benz-in në pronësi të një shtetasi të Kosovës, ndërsa kontrata e shitblerjes ishte kryer pasi figuronte ende ish-bashkëshorti si pronar i automjetit Reno. Ajo nënvizoi se dhe vetë blerësi deklaron se nuk ka paguar asnjë vlerë monetare për makinën.
Lidhur me konstatimin për pamundësinë në investimet e kryera në kapitalin themeltar të një shoqërie, Gjoni shpjegoi se ish-bashkëshorti nuk i ka dhënë shpjegime për veprimtaritë e tij tregtare dhe se ajo nuk e kishte bezdisur me pyetje. Sipas subjektit, ish-bashkëshorti nuk kishte bërë pagesë të kapitalit themeltar, por në cilësinë e administratorit kishte kryer disa operacione financiare të aktivitetit të shoqërisë.
Ajo shtoi se dhe ortaku ka deklaruar se ish-bashkëshorti nuk kishte kryer pagesë dhe se kjo kishte sjellë edhe konflikt mes tyre. Gjoni kërkoi të mos përfshihet në analizë vlera e kuotave, duke u mbajtur në vëmendje se janë krijuar para martese dhe se nuk ka pasur dijeni.
Subjekti theksoi se ish-bashkëshorti ka pasur pasuri vetjake, prej të cilave ajo nuk ka përfituar asgjë. Sipas saj, kur kanë qenë të martuar, ai nuk ka krijuar asnjë pasuri, madje dhe ka humbur. Aj nënvizoi se pasuria e saj e vetme është një automjet për të cilin provohen burimet e ligjshme dhe këmbënguli se e kalon testin për pasurinë.
Komisioni nuk evidentoi probleme domethënëse në kriterin e figurës dhe të profesionalizimit, megjithatë, subjekti dha shpjegime të detajuara për disa denoncime.
Në përfundim, prokurorja Oltiana Gjoni Çifliku kërkoi konfirmimin në detyrë. KPK njoftoi se vendimi do të shpallet më datë 4 shtator, në orën 15:45.
