Prokurorja Oltiana Gjoni (Çifliku) e Prokurorisë së Juridiksionit të Përgjithshëm Durrës do të përballet të martën më 3 shtator me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Roland Ilia, Suela Zhegu dhe Genta Tafa Bungo.
Oltiana Gjoni përfundoi studimet në Shkollën e Magjistraturës në vitin 2011 dhe pas një periudhe stazhi në Prokurorinë e Tiranës, u emërua në Prokurorinë e Rrethit Gjyqësor Shkodër. Prej vitit 2015, ajo e ushtron funksionin e prokurores pranë Prokurorisë së Juridiksionit të Përgjithshëm Durrës.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë familjare të prokurores Oltiana Gjoni nga viti 2011 deri në fund të vitit 2019.
Në deklarimin për herë të parë në vitin 2011, prokurorja Oltiana Gjoni nuk zotëronte asnjë pasuri, ndërsa në fund të vitit 2019, pasuria e saj familjare kap vlerën e 13.7 milionë lekëve.
Ajo zotëron familjarisht pasuri të paluajtshme me vlerë 12 milionë lekë, kursime në cash prej 1 milion lekësh, likujditete bankare prej 402 mijë lekësh dhe automjet me vlerë 308 mijë lekë.
Të ardhurat familjare për periudhën deklaruese janë 14.2 milionë lekë, nga të cilat 66% kanë si burim pagën e subjektit, 11% të ardhurat e bashkëshortit nga biznesi dhe 13% e të ardhurave totale deklarohen me burim qiratë.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 9 vite, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamur të kuq” mungesën e deklarimit të burimeve të pasurisë së bashkëshortit të subjektit.
Nga analiza e deklaratave të interesave private të subjektit Oltiana Gjoni (Çifliku), vërehet rritje e ndjeshme e vlerës së aseteve që vijnë si rrjedhojë e deklarimit për herë të parë të bashkëshortit Laert Gjoni. Pasuria e tij vlerësohet rreth 13.8 milionë lekë, por nuk ka të dhëna mbi burimin e krijimit të kësaj pasurie.
Në vitin 2014 subjekti deklaron likuiditete në cash në shumën 1,000,000 lekë me burim kredimarrje Raiffeisen Bank – nuk ka të dhëna në vitet në vijim lidhur me arsyen/objektin e kësaj kredimarrje.
Deklarata Para Fillimit të Detyrës
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Deklarata e pasurisë së vitit 2019
Për më shumë dokumente vizitoni databazën tonë dokumente.reporter.al
