Ndihmësi ligjor pranë Gjykatës së Apelit të Juridiksionit të Përgjithshëm, Ervin Xhihani pranoi të hënën para Komisionit të Pavarur të Kualifikimit se ai nuk kishte prova për të rrëzuar barrën e provës mbi pamundësitë financiare të prindërve në krijimin e kursimeve në bankë dhe ndërtimin e një shtëpie, por tha se këto nuk duhej ta penalizonin.
“Parimisht jam dakord me gjetjet në shtyllën e pasurisë. Nuk mund t’i rrëzoj”, tha Xhihani në një mbrojtje emocionale. Ai tha se pasuria e prindërve ishte vendosur para se ai të fillonte detyrën dhe banesa e ndërtuar në Pogradec dhe legalizuar nga e ëma ishte bërë gjatë kohës që ai ishte student.
Seanca dëgjimore për Xhihanin ishte shtyrë nga Komisioni i Pavarur i Kualifikimit, KPK, më 12 shtator pas marrjes së dy denoncimeve dhe rifilloi të hënën pasi trupa e përbërë nga komisionerët Brunilda Bekteshi, Olsi Komici dhe Suela Zhegu relatore kishte hetuar edhe mbi këtë çështje.
Gjatë seancës u bë me dije se denoncimet kishin të bënin me akuzat se Xhihani, një avokat i njohur i tij dhe një prokurore me të cilën ai kishte lidhje ishin përfshirë në zbutjen e akuzave për vrasje. KPK që vuri në dukje se nuk kishte gjetur probleme të figurës së ndihmësit ligjor, i kërkoi atij shpjegime pasi tha se kishte provuar se Xhihani dhe avokati kishin udhëtuar sëbashku. KPK po ashtu gjeti se prokurorja, e cila është nëna e dy fëmijëve të Xhihanit, kishte udhëtuar me ndihmësin ligjor me makinën e avokatit.
Por Xhihani mohoi se kjo lidhje kishte ndikuar në çështjen në hetim. Ai tha se avokati nuk përfaqësonte të dyshuarin për vrasje dhe se marrëdhënia e tyre ishte korrekte. Xhihani po ashtu u pyet gjerë e gjatë në KPK edhe për marrëdhëniet me nënën e fëmijëve. Të dy rezulton se deklaronin një lidhje, por jo bashkëjetesë dhe as martesë. I pyetur nga vëzhguesi i ONM-së Ferdinando Buatier, Xhihani tha se përveç dhuratave dhe drekave apo darkave nuk kontribuonte financiarisht për fëmijët. Ai tha se ata jetonin ndarë për shkak të rrethanave sociale dhe për shkak të një problemi shëndetësor të njërit prej fëmijëve, për të cilin kujdesej gjyshja nga mamaja.
Sa i përket pasurisë Zhegu vuri në dukje se aktiviteti tregtar i prindërve, mbi të cilën ishte ndërtuar një shtëpi, ishte blerë një makinë dhe krijuar një depozitë prej 8.9 milion lekësh, nuk kishte paguar detyrime fiskale. Relatorja tha se prindërit e subjektit gjendeshin në pamundësi financiare për të krijuar këto shuma, se deklarimi nuk kishte qenë i plotë dhe i saktë. Ajo po ashtu vuri në dukje se aktiviteti tregtar ishte mbyllur dhe hapur herë pas here, ndërsa në të gjitha rastet nuk u gjetën të dhëna për pagesën e tatimeve.
Xhihani shmangu detajet në mbrojtjen e tij. Ai pranoi relatimin dhe faktet dhe tha se nuk mund ta rrëzonte barrën e provës. Por ai tha se dokumentimi i të ardhurave nuk bëhej dot për shkak të djegies së arkivave në vitin 1997 dhe këmbënguli se depozita kishte për burim vite të tëra të punës së prindërve dhe se ishte krijuar kur ai ishte vetëm 10 vjeç.
I pyetur nga KPK për mungesë të dokumentacionit në vitet pas 97’, Xhihani sërish këmbënguli se pasuria ishte krijuar më herët dhe se prindërit kishin bërë qarkullimin e këtyre parave. Ai pranoi pasaktësi në deklarime, por tha se kjo vinte ngaqë nuk kishte deklaruar më herët.
Xhihani ka punuar më parë në Gjykatën Administrative të Shkallës së Parë Korçë, ndërsa aktualisht e ushtron detyrën pranë Gjykatës së Apelit të Juridiskionit të Përgjithshëm në Tiranë.
Xhihani kërkoi konfirmim në detyrë. Seanca për njoftimi e vendimit u vendos më 2 tetor në orën 9:45.
