Këshilli i Lartë Gjyqësor, KLGJ i dha fund të mërkurën më 16 tetor investimit dy vjeçar të kryer në procedurën disiplinore ndaj gjyqtarit të Gjykatës së Kukësit, Sajmi Ujkashi si dhe ndaj gjyqtares së Tiranës, Kaçe Agolli, pas shkarkimit të tyre me formë të prerë nga ana e institucioneve të vetingut.
Katër pikat e para të rendit të ditës të parashikuara nga KLGj për t’u trajtuar në mbledhjen plenare të së mërkurës kishin të bënin me procedimet disiplinore ndaj Ujkashit dhe Agollit, të filluara me kërkesë të Inspektorit të Lartë të Drejtësisë, ILD.
Ndaj ish-gjyqtarit Sami Ujkashi, bazuar në kërkesat e ILD, janë filluar tre procedime disiplinore. ILD kërkoi dy vjet më parë pezullimin nga detyra të Ujkashit, por pasi ai siguroi raporte për paaftësi në punë për muaj me radhë, duke shmangur procedimin disiplinor.
Ujkashi u shkarkua nga detyra më 28 korrik 2023 për probleme në kriterin e pasurisë dhe vendimi u la në fuqi një vit më vonë nga Kolegji i Posaçëm i Apelimit.
Përfaqësuesi i ILD, deklaroi të mërkurën në mbledhjen plenare të Këshillit se pas vendimarrjes së Kolegjit, Ujkashi nuk e gëzon më statusin e magjistratit dhe për rrjedhojë ka humbur objekti i procedimit disiplinor të filluar ndaj tij. Sipas ILD, procedimi disiplinor për Ujkashin duhet të përmbyllet pa një vendim përfundimtar – kërkesë që u gjet e drejtë nga gjithë anëtarët e KLGJ, të pranishëm.
Ngjashëm u arsyetua edhe për procedimin disiplinor të filluar ndaj gjyqtares Kaçe Agolli, e shkarkuar nga detyra me vendim të formës së prerë të KPA të datës 3 korrik 2024. Problemet me pasurinë dhe vendimi i debatueshëm në favor të biznesmenit Francesco Bechetti, penalizuan gjyqtaren Kaçe Agolli në Komisionin e Pavarur të Kualifikimit.
Ndryshe nga Ujkashi, ajo u paraqit në mbledhje dhe deklaroi se kishte ardhur në respekt të procedurës dhe të anëtarëve të KLGj. Agolli u shpreh dakord me kërkimin e ILD për përfundimin e procedimit të saj disiplinor pa vendim përfundimtar.
