Kandidatët e vetëm në garë nga radhët e shoqërisë civile për dy vende vakante në organet drejtuese të drejtësisë iu nënshtruan një votimi formal në seancë plenare të enjten, pasi nuk arritën të marrin shumicën e cilësuar të votave në dy raundet e para të votimit.
Me një shumicë të thjeshtë votash që erdhën vetëm nga mazhoranca, Violanda Theodhori u zgjodh anëtarja e re në Këshillin e Lartë Gjyqësor, duke zëvendësuar kryetaren e këtij këshilli Naureda Llagami, së cilës i ka përfunduar mandati që në dhjetor 2023.
Po ashtu, i vetmi kandidat në garë për anëtar i Këshillit të Lartë të Prokurorisë u votua Erjon Fejzulla, i cili zëvendëson vendin vakant të lënë nga Alfred Balla, i larguar nga procesi i vetingut.
Me një votim elektronik të fshehtë, Theodhori mori 69 vota pro, 3 abstenim dhe 1 kundër, ndërsa për Fejzullën ishin 68 vota pro, 4 abstenim dhe 1 kundër.
Kryetarja e Kuvendit, Elisa Spiropali, njoftoi se sipas dispozitave ligjore të dy kandidatët e listës së tretë të shortit të hedhur në nënkomisionin e posaçëm parlamentar konsiderohen të zgjedhur.Ky votim përmbyll një proces të gjatë të nisur që me shpalljen e vendeve vakante nga radhët e avokatisë dhe shoqërisë civile në korrik të vitit të shkuar.
Gara u luajt vetëm mes këtyre dy emrave pasi të dy kandidonin për KLGJ dhe për KLP kandidonte vetëm Fejzulla.
Në dy shortet e para me gogla ishte përzgjedhur Fejzulla si kandidat për KLGJ, ndërsa gara për KLP-në ishte futur në ngërç pasi nuk kishte asnjë kandidat në dy raundet e para të votimit në seancë plenare.
Rastësia e shortit të tretë caktoi nga një emër për secilin vend vakant në këshill, duke nxjerr fituese për KLGJ Violanda Theodhorin, ndërsa Erjon Fejzulla doli kandidat i vetëm për KLP.
Lista e kandidatëve nga shoqëria civile gjatë fazës të verifikimit ligjor nga Sekretari i Përgjithshëm i Kuvendit u reduktua në vetëm dy emra nga 6 të tillë të sjellë nga komisioni Ad-Hoc i ngritur nga Avokati i Popullit që bën verifikimin paraprak të tyre.
Përfaqësuesit e opozitës në nënkomisionin e posaçëm për përzgjedhjen e kandidatëve e kontestoi si antiligjore dhe paracaktuese reduktimin e listës së kandidatëve, ndërsa sipas mazhorancës skualifikimi bazohej në kriteret e forta të verifikimit të përcaktuara në ligj.
