Gjykata e Posaçme e Shkallës së Parë, shpalli të hënën më 21 tetor vendimin për deklarimin fajtor të anëtarëve të një grupi kriminal, mes të cilëve dhe një ish-funksionar policie, që akuzohen se në bashkëpunim me njëri-tjetrin krijuan kushtet për vrasjen e Xhevdet Kiss Plakut në shtator të vitit 2019.
Në përfundim të shqyrtimit të çështjes, trupi gjykues i përbërë nga gjyqtarët Erjon Bani, Flora Hajredinaj dhe Rudina Palloj kanë dënuar me 5 vjet burgim Rexhep Rapi alias Kep Arapi, i cili organizoi tentativës e vrasjes së Plakut pasi dyshonte se ishte autor i ekzekutimit të një familjari të tij në vitin 2000. Të pandehurit Algert Rapi, Dejvi Gjermëni dhe Dedan Gjoni, u dënuan me nga 4 vjet e 8 muaj burgim. Dënimet përfundimtare u dhanë në aplikim të gjykimit të shkurtuar, prej nga të pandehurit përfituan uljen e 1/3-ës së masës ndëshkimore.
Të dënuarit u akuzuan nga Prokuroria e Posaçme, SPAK për veprat penale “Sigurimi i kushteve dhe i mjeteve materiale për të kryer vrasje”, në dëm të Plakut, kryer në formën e bashkëpunimit të veçantë atë të grupit të strukturuar kriminal, “Kryerja e veprave penale nga organizata kriminale dhe grupi i strukturuar kriminal”, si dhe “Grupi i strukturuar kriminal”.
Hetimi ndaj të dënuarve filloi bazuar në informacionet e përcjella nga Prokuroria e Rrethit Limburg në Holandë. Sipas SPAK, i dënuari Rexhep Rapi dhe objekti i atnetatit, shtetasi Xhevdet Kiss (Plaku), kanë pasur një konflikt, pasi në vitin 2000 në qytetin e Savona-s të Italisë, është vrarë me armë zjarri Sali Rapi, i cili rezulton të jetë familjar i shtetasit Rexhep Rapi. Si autorë të vrasjes së Sali Rapit u dyshuan Xhevdet Kiss (Plaku) dhe një tjetër person, të cilët edhe janë arrestuar atëherë. Në prill të vitit 2014 Xhevdet Kiss (Plaku), është shpallur i pafajshëm nga Gjykata e Savona-s në Itali.
Pas kësaj vendimmarrje, në shenjë hakmarrje për vrasjen e Sali Rapit, i dënuari Rexhep Rapi është organizuar në kuadër të një grupi të strukturuar kriminal, me qëllim vrasjen e Plakut. Ai e ka krijuar grupin kriminal, pasi ka dështuar ta vrasë Plakun tre herë më parë, dy herë në Durrës dhe një herë në Tiranë. Rapi ka bërë pjesë të grupit persona me lidhje familjare, nipin e tij, Algert Rapi, Dejvi Gjermënin dhe Fatjon Dervishin. Ky i fundit është vrarë në shtator të 2023-it. Pjesë e grupi është bërë dhe ish-shefi i Komisariatit nr.6, Dedan Gjoni.
Kur objekti i atentatit, Xhevdet Kiss (Plaku) është shoqëruar në ambjentet e Drejtorisë Vendore të Policisë Durrës më 17 shtator 2019, funksionari i policisë, Dedan Gjoni ka komunikuar me të dënuarin Dejvi Gjermëni, të cilin e ka njoftuar mbi faktin e ndalimit të tij.
Më pas, i pandehuri Dedan Gjoni i ka dërguar të pandehurit Dejvi Gjermëni, foton e shtetasit Xhevdet Plaku dhe një mesazh ku e informon që do të dilte në orën 20:00, nga dera e mbrapme e Rajonit të Policisë. Këtë informacion, i pandehuri Dejvi Gjermëni i’a ka dërguar më pas të pandehurit Algert Rapi, nipit të Rexhepit. Pas marrjes së këtyre informacioneve, Rexhep rapi është organizuar me njerëzit e tij për të kryer vrasjen e Plakut, duke i zënë pritën.
Vrasja nuk është realizuar, pasi i pandehuri Gjermëni ka pasur frikë se informacioni i dërguar përmes aplikacioneve mund të zbulohej më vonë. Ai i ka thënë të pandehurit Algert Rapi që Rexhepi të largohej, pasi Xhevdeti nuk ishte më në rajon sepse e kishin liruar më parë.
Ish-funksionari i policisë, Dedan Gjoni akuzohet dhe si pjesë e një krupi të strukturuar kriminal me aktiviet trafikun e narkotikëve nga vendet e Amerikës Laytine dhe pastrim të parave. Mes të proceduarve në këtë çështje janë dhe ish-drejtuesi i lartë i Policisë së Shtetit, Erzen Breçani, djali i këtij të fundit, Eralbi Breçani dhe biznesmeni Ervin Mata.
Ata u arrestuan në nëntor të vitit që shkoi pas të dhënave të marra prej aplikacionit SKY ECC, në të cilin sipas prokurorisë gjenden biseda komprometuese ndaj tyre.
