Një punonjës i një aktiviteti për përpunimin e gurit, që ndodhet mes Beratit dhe Poliçanit, u dëmtua gjatë kohës që ishte duke punuar me një mjet të rëndë.
58 vjeçari, me inicialet F. T, mbërriti i plagosur në Spitalin Rajonal të Beratit ditën e martë 22 tetor. Burime nga reparti i kirurgjisë pranë këtij spitali thanë për BIRN, se burri u paraqit me plagë në gjymtyrët e poshtëm dhe ju nënshtrua menjëherë ndihmës shëndetsore.
Informacioni i parë për ngjarjen e ndodhur në vendin e punës, në subjektin që përpunonte gurin e nxjerrë në një nga guroret e malit të Tomorrit, ka mbërritur fillimisht në Stacionin e Policisë së Poliçanit.
Ka qënë vetë subjekti që ka vënë në djeni stacionin e policisë për dëmtimin e punonjësit, gjatë kohës që punonte me një mjet tip pirun, duke përpunuar gur dekorativ.
“Nisi procedimi në gjendje të lirë për shtetasin V. F., 41 vjeç, banues në Berat, pasi gjatë punës në subjektin për përpunimin e gurit që administron, është dëmtuar aksidentalisht, me mjetin e punës (pirun), shtetasi F. T., 58 vjeç”, tha Drejtoria Vendore e Policisë së Qarkut të Beratit, në një njoftim për shtyp të shpërndarë për mediat gjatë të mërkurës.
Subjektet e nxjerrjes dhe përpunimit të gurit dekorativ dhe atij të mermerizuar që ndodhen në malin e Tomorrit, përveçse akuzohen se ndër vite kanë shkaktuar një krim mjedisorë, konsiderohen si aktivitet me rrezik të lartë për aksidente në punë.
