Anija “Libra” e marinës italiane, me 8 emigrantë në bord 6 nga Egjipti dhe 2 Bangladeshi, u ankorua rreth orës 8:00 të mëngjesit të së premtes në Portin e Shëngjinit. Kjo është anija e dytë me emigrantë të kapur në Mesdhe që vjen në Shëngjin, pasi në tetor një udhëtim i ngjashëm dështoi kur një gjykatë në Romë vendosi se refugjatët e sjellë në Shqipëri duhej të dërgoheshin në Itali.
Pas procedurave brenda anijes, në orën 9:00 refugjatët nën shoqërinë e forcave të sigurisë Italiane zbritën grupe-grupe dhe u vendosen në qendrën pritëse brenda portit të Shëngjinit.
Aty, ata do të qëndrojnë në karantinë për disa orë, ku po kryhet edhe verifikimi i tyre dhe kontrolli shëndetësor e më pas me autobus do të dërgohen në kampit e Gjadrit.
I gjithë ky operacion i dytë i këtij lloj u zhvillua nën masa të rrepta sigurie, ku krahas autoriteteve Italiane pati prani dhe të policisë shqiptare.
Marrëveshja me Italinë për emigrantët u firmos më 6 nëntor 2023 në Romë mes kryeministrit Edi Rama dhe kryeministres italiane Giorgia Meloni dhe ngjalli shumë debate në të dy anët e Adriatikut, por pavarësisht kundërshtimeve u ratifikua me shumicë votash nga parlamentet e të dy vendeve. Italia pritet të shpenzojë me 670 dhe 850 milionë euro për këtë skemë, e cila është normalisht më e kushtueshme se sa trajtimi i zakonshëm në territorin italian.
Grupi i parë i emigrantëve të cilët mbërritën më 16 tetor qëndruan vetëm tre ditë në Shqipëri, pasi Gjykata e Romës detyroi Italinë të kthejë mbrapsht kontingjentin e azilkërkuesve, pasi nuk vinin nga vende të sigurta. Për të zgjidhur ngërçin, më 21 tetor kryeministrja Giorgia Meloni nxori një dekret ku përditësonte listën e vendeve të sigurta dhe tashmë mbetet për tu parë funksionimi ose jo i kësaj marrëveshje. Marrëveshja është kritikuar ashpër nga organizatat e të drejtave të njeriut, që e shohin atë si të rrezikshme dhe ngrenë dyshime se për pasojë do të cënohet procesi i rregullt ligjor i trajtimit të azilkërkuesve.
