Kosova dhe Maqedonia e Veriut u zotuan të hënën të lehtësojnë lëvizjen e qytetarëve përtej kufijve duke rënë dakord që nga viti i ardhshëm të aplikojnë marrëveshjen “një sportel i vetëm” në pikat e kalimit kufitar.
Ministrat e brendshëm të vendeve, Xhelal Svecla dhe Pance Toskovski, e nënshkruan protokollin gjatë një takimi të përbashkët të dy qeverive të mbajtur në Prishtinë, ku u finalizuan dy marrëveshje të tjera për energjinë dhe arsimin.
“Rritja e shkëmbimit tregtar mes vendeve tona është reflektuar edhe me rritjen e lëvizshmërisë së qytetarëve tanë. Në periudhën janar-nëntor të këtij viti, janë regjistruar pothuajse pesë milionë kalime kufitare në të dy drejtimet, një rritje e konsiderueshme nga 3.5 milionë që ishte në vitin 2019”, tha kryeministri i Kosovës Albin Kurti gjatë takimit me homologun e tij nga Maqedonia e Veriut, Hristijan Mickoski, dhe kabinetet e tyre.
“Duke filluar nga 1 janari 2025, në dy pika kalimi, Hani i Elezit-Bllacë dhe Jazhincë-Globoçicë, do të zbatojmë një… model ku policët tanë punojnë së bashku në të njëjtën ndërtesë. Ky bashkëpunim do të reduktojë kohën e pritjes në kufi dhe do të lehtësojë lirinë e lëvizjes së qytetarëve tanë”, tha Kurti gjatë takimit.
Mickoski tha se dëshiron të mbajë “marrëdhënie miqësore të cilat do t’i avancojmë më tej me uljen e barrierave”.
“Do të isha i lumtur nëse brenda disa javësh do të mund të shihnim një kontroll të vetëm kufitar dhe jo dy, duke shmangur kështu turmat në kufi dhe duke shkaktuar ndjenja të pakëndshme në pikat e kalimit kufitare”, tha Mickoski. “Ne synojmë të shkojmë drejt një Evrope pa kufij”, shtoi ai.
Kurti tha se shkëmbimi tregtar ndërmjet Kosovës dhe Maqedonisë së Veriut, i regjistruar në 432 milionë euro në vitin 2023, paraqet “një rritje prej 52 për qind krahasuar me vitin 2019, kur ishte 284 milionë euro”. Kurti tha se eksportet e Kosovës në Maqedoninë e Veriut u rritën nga 44 milionë euro në vitin 2019 në 121 milionë në vitin 2023.
Mickoski bëri thirrje për rritje të bashkëpunimit. “Këtë vit, tregtia mes vendeve tona do të arrijë mbi 500 milionë euro dhe në vitet e ardhshme edhe më shumë. Kjo do të sjellë përfitime për dy vendet tona”, tha Mickoski.
Që nga prilli i vitit 2016, qytetarët e Kosovës dhe Maqedonisë së Veriut kanë mundur të kalojnë kufijtë vetëm me kartat e tyre të identitetit, pasi u arrit një marrëveshje për të lehtësuar udhëtimin mes dy vendeve.
“Kosova dhe Maqedonia e Veriut nuk kanë mosmarrëveshje. Ne kemi komunikim të vazhdueshëm. Ekonomia, tregtia, arsimi, shëndetësia, turizmi dhe bashkëpunimi rajonal janë vetëm disa nga temat”, tha Kurti.
