Një 50-vjeçar mbeti i vrarë pas një aksidenti në punë të martën (26 nëntor) në Durrës, ndërsa policia arrestoi të mërkurën dy përgjegjës të kompanisë për të cilën ai punonte. Policia bëri me dije se Dritan Nasufi, nga Durrësi mbeti i vrarë pas një aksidenti me një prej mjeteve të punës.
Aksidenti me mjetin e punës ndodhi pak momente pas pushimit të drekës, ndërsa burri ndodhej duke prerë disa pjesë duralumini. Policia që nisi hetimet menjëherë pas ngjarjes gjeti probleme me masat e sigurisë në vendin e punës.
‘’Specialistët për Hetimin e Krimeve të Komisariatit të Policisë Durrës, në vijim të veprimeve hetimore arrestuan në flagrancë shtetasit L.H, 47 vjeç, banues në Durrës dhe shtetasit G.A, 52 vjeç, banues në Tiranë, përgjegjës në subjektin e duraluminit”, tha policia vendore e qytetit bregdetar, në një njoftim për shtyp.
Sipas policisë dy personat e ndaluar, akuzohen për veprën penale “Shkelje e rregullave të mbrojtjes në punë”. Siguria në punë vazhdon të jetë problematikë në qytetin bregdetar, ku aksidentet me pasoja fatale nuk kanë munguar as gjatë karantinës së pandemisë së COVID-19.
